OMHEDI – Omupresidente Netumbo Nandi-Ndaitwah okwa ti omaongo okwa fimana pamufyuululwakalo wOshiwambo molwaashi ohaa etele ovanhu ombili, ehafo noukumwe vovanhu tava hangana.

“Pefimbo lomaongo ovanhu ohava kala vangudumana vo tava imbi nokudana eenghama,” ta ti.

Edi Nandi-Ndaitwah okwe di popya Olomakaya pefimbo loshivilo shomaongo osho neudo sha danenwa kouhamba kOmhedi moshitukulwa shaHangwena.

Neudo oshivilo shomaongo osha danenwa koshi yoshipalanyole “Okukaleka po efimano lomifyuululwakalo detu noukumwe.” 

Ovaleli vopapolitika, ovaleli vopamifyuululwakalo, oshiwana  mwa kwatelwa ovanyasha nounona novaleli veengeleka okwa li va holoka momwaalu muhapu koshivilo shomaongo.

Oshivilo shomaongo ohashi danwa omudo keshe komalelo opamifyuululwakalo monooli noshi li sha fimana. 

Omudo wa dja ko oshivilo shomaongo osha danenwa kelelo laNdonga.

Omudo tau ya oshivilo shomaongo otashi ka danenwa kelelo laUukwambi noUukwaluudhi.

Edi oda popiwa kelenga lakula tali wilike oshitunda shaUukwambi Chief Herman Iipumbu pefimbo loshivilo shomaongo sha li kOukwanyama.

Omupresidente okwa pula omalelo opamifyuululwakalo opo a twikile okudana oivilo yomaongo molwaashi otashi kaleke po efimano leenghulunghedi nomifyuululwakalo.

“Onda pandula elelo laUkwanyama eshi la unganeka oshivilo shomaongo neudo. Omifyuululwakalo oda fimana moshilongo,” ta ti.

Okwa ti oivilo yomaongo ohai hanganifa ovanhu va dja komalelo opamifyuululwakalo a yooloka osho tashi ulike oukumwe nosho yo elongelokumwe.

 Nandi-Ndaitwah okwa kunghilila omalelo opamifyuululwakalo opo a kale kokule nokulongifa oulingilingi.

“Yakuleni oshiwana moshili pehe na omunhu ta ningwa okatongo. Kalekei po ombili noukumwe momalelo eni,” ta ti. 

-fhamalwa@nepc.com.na