Rudolf Gaiseb

Ministeri, Sîsengu tsî !Nari!oabas dib, Veikko Nekundib ge ge mî, N$825 miljuns a ǂhâbasa !khaisa, !nari!oabade omkhâis proxrammi !aroma. 

Nē proxrammi di ǁgūbas ge !hūdaoga ǂhâbasa ǂgaoǀkhādi ai ra dīǀoaǀoadaogu !nâ dawa!khunisa. Nēs ge danase ra sîsenūhe daogu tsî !hū-ǁare ra daoga ǂnuwisa !khōǂgā hâ. “Ministeris ge ra ai!gû, ǀkharisi daoga ǂnuwisa hîa !garo!ā ǀhûsiga sâuǁkhāsib senterdi tsî ǀhûhâsib !oabade sī!nâs di ǂhâbasa !ēsa ra māga,” tib ge ministera ǂoa ge wekheb di Wunstaxtsēs ai !Haosi ǂNûs ǁanina gere mîba. ǁÎb ge kurutoahes 58 kilometergu di !nūsiba !khōǂgā hâ ǀAeǁgams-Kaiǁkhaes TR1/6 daob hîa ge ǀgamǀgamse ra !khoe daob hîa Brakwatersa xu Kaiǁkhaes-ǂGaribeb tsî Kaiǁkhaes-Otjiwarongos ǀhao-ams daogu dis kōse ra sīb disa ge ǂanǂan. ǀArosen raseb ge, !Gomenǁgamsa xu Tsoaxubams (ǂGuro !haros dana daob dis), MR44, MR36 tsî TR2/1 hâgu dis ge 12 kilometerga a ǀarohes tsîna ge ǂanǂan. Nekundi gere ǀgongon!gaos ge, ǀgū-ae ge a hâ !hūb !nâ dâu!khūdi ge gaisa ǂkhôaba !nāsa daogu ai dī tsî ǀnî sîsenxasiga a !hâumâis tsîna ge mî. Nēn hoana ǂâis !nâ ūhâseb ge ministera gere ǂgan îb N$49.8 miljunsa ǀNanub, ǀGammi tsî ǂOab māǂuidi !Khōdanas !âb !aroma !khō!gâbahe. 

“Nē proxrammi di ǂâibasens ge, ǁaeb ai hâ tsî ǂâuǀoahâ ǂoab tsî ǀnanub mâsiga ǂanǂansa tsî ǂhâbasa !khâikhomde ǀgau rase māsa. Nēs ge sao !âgu hîa ǂoab tsî ǀnanub mâsin xa ai!gûs âna ra tanihen !aroma kaise a ǁkhiheǁkhosa, ǂgaiǀons ai anikuniǁkhanadi !âb, ǂâioǂamse ra hā ǁkhōǁkhōsasin, !hū-omkhâis tsî !hanaǂgāb, !nari!oabadi, ǂurusib, ǀgaib, ǁau!khōs, ǂnamipeb tsî !narisarimas tsî ǂnuwisîsengu tsîna,” tib ge ge mî. Ministeri ge ǁ-îb di ǁkhoreb hîab Namibiab ga !norasa tsî ǂgomǂgomsa !nari!oabade a ūhâs diba gere ǀgoragu. Ai!âb nē a ǂâi!nâǁguisa proxrammna !khōǂgā hân ge, ǀaweǁguiba dī, ǂnuwi, ǂgaoǀkhāsa !harib ǁga omkhâi tsî !gâi mâsib !nâ hoaǁae ǀuridaoga ūhâ tsî nēs !nâ-ū !norasa tsî  !hūsâuǁkhāsiba ra hui!nâ tsî ǀomkhâi kai omkhâisensa ǁawoǁawosa. Ministeris ge nē ǀō-aisa proxrammi !aroma N$990 miljuns marisa ǂhâba hâ. ǂOa ge kurib !nâs ge ministerisa 226 kilometergu !nūsiba !khōǂgā hâ ǀuridaob !gâi!gâi!nâde !Gomenǁgams tsî Krantzbergs ǁaegu ǁgoe ǀuridaob ai ge dītoa. Oshakatis Trens-mâ-ais omgu tsî hoa ǂnamipeb ǁîs dib tsîn hoan ge CCTV hân hoan ǀkha ge dītoahe. Ministeri noxopa ge mîs ge, !kharu ge !nona kurigu ǁaeb !nâb TransNamiba ǁaupexa 1.3 xu 1.5 miljuns tongu tanixūna gere !naosa. Hāaro rases ge ministerisa N$103.4 miljunsa !Auga1hūsi !Gamhuriǁuib ǂNûiǂgās di ǂgaoǀkhādi ai dīǀoaǀoas !aroma huri-ammi !nao-aiǁhôas tsî nau !âgu !aroma nî ǂhâba. Namibiab ǁkhana!oabadi !âb !aromas tsînas ge N$562 miljunsa a ǂhâbasa, ministerisa di ǂgansa !oa.