ONGWEDIVA-Omupopiliko welelo laNgandjera Sakeus Shangula okwa ti oumbudi weendongi owa londa neenghono moshitunda shavo molwashi ovanhu vahapu ove hole ombelela yandongi. 

Okwa ti koAmarika oko unene kwa didilikwa ovanhu tava vake po eendongi davakwao ndele tava ka landifa ombelela. 

“Omunhu ngeenge okwa vake po ondongi ya mukwao, ohe i dipaa nokulandifa ombelela keendingosho,” Shangula ta ti. 

Okwa ti ombelewa yelelo laNgandjera ohai ya kula omanyenyeto mahapu okudilila moshiwana tashi okulopta eendongi davakwa po. 

Omupopiliko wopolifi moshitukulwa shaMusati Senior Inspector Anna Kunga okwa ti oshivike eshi okwa lopotwa oibofa ivali youlunga weendongi koshikandjohoololo shaGongo. 

Shangula okwa ti omunhu ngeenge okwa vake po ondongi ohai ka dipaelwa kokule opo iha monike kumwene wayo. 

“Ovanhu ohava ka landifa po eendongi davakwao komikunda dokokule ile ve di pingafane po neendongi dokokule. Ngeenge omunhu okwa pingafana po ondongi ya mukwao, oha pewa ondongi oyo ihe shivike po pomudingonoko opo,” Shangula ta hokolola. 

Okwa yelifa ta ti oumbudi woimuna owa nyika oshiponga shaashi omunhu ngeenge a vake po oshimuna shamukwao ota pangulwa komhangu yoshinanena ile komhangu yopamufyuululwakalo opo a pewa ehandukilo lopaveta. 

Kansela woshikandjohoololo shaTamanzi Johannes Iiyambo okwa koleka ta ti ombelewa yaye nayo ohai lopotelwa eelopota dovanhu tava vake po eendongi davakwao. 

“Ombelela yandongi oiholike moshikandjohoololo shange. Ngeenge owai keendingosho oto hange ko ovanhu tava landifa okapana kandongi mwa kwatelwa eedingu,” ta ti. 

Iiyambo okwa ti ovanhu ove hole ombelela yandongi shaashi kai na omukifi wongauta. 

Kansela okwa ti ovanhu vamwe ohava xupu meengeshefa davo dokulandifa okapana kandongi ile eendongi di na omwenyo. 

“Ongeshefa yeendongi ohai e tele ovanhu oyuuyemo. Omunhu ngeenge okwa landifa okapana kandongi oha dulu okumona mo oshimaliwa shokulanda oikulya yomeumbo,” ta ti.

fhamalwa@nepc.com.na