ONGWEDIVA – Momutengenekwamuyalu gwomumvo gwoshimaliwa 2025/26, elelo lyondoolopa yaNgwediva omwa tengeneke oomilliona N$7.3 tadhi ka longa okapale komaudhano gayooloka okanene oshowo ehala lyomayinyanyundho ko Extension 11 mOngwediva.
Mayola gwondoolopa yOngwediva Tarah Shalyefu okwa totha mo ngaaka Etiyali sho elelo lyondoolopa lya pititha mo etengenekothaneko lyomumvo 2025/26 lyoshimaliwa oomilliona N$205.5.
“Ota tu ka tsikila okulonga okapale komaudhano ga yooloka mOngwediva, nangaashingeyi okeli metifa okutungwa,” Shayefu ta ti ngaaka.
Ta ti, okapale komaudhano ga yooloka otaka pula oshimaliwa shi thike poomiliona N$4.3 okulongwa. Shalyefu ta ti, ehala lyomayinyanyundho ndyoka tali tungwa koExtension 11, ota li longwa koomilliona ndatu. “Ehala ndyoka lyomayinyanyundho, oli li konima yomatungilo goChicco Mall,’’ ta ti ngaaka.
Mayola gondoolopa okwa fatuula kutya elalakano lyokuya po nomahala ngoka okugandja omahala gomainyanyundho kaakalimo yomOngwediva opo ya kale ye na mpoka haya vulu okuya uuna ya hala okupita mo momagumbo gawo,” ta fatulula ngaaka.
Ta ti, omahala gokwiinyanyundha oga pumbiwa moshigwana.
“Omahala gatya ngaaka ohaga yambindhindha wo natango kuundjolowele womuntu, oshowo ohaga gandja oompito dha yooloka kaanona oshowo kaanyasha opo kaaya kale momapandaanda moka hamu zi omashongo ogendji,” ta ti ngaaka.
Ta ti, ehala lyatya ngiika natango otali humitha komeho ondoolopa yaNgwediva.
Shalyefu okwa ti ehala lyomayinyanyundho ota li longwa momalweetho gatatu.
“Ehala ndyoka otali kala lina iinyangadhalwa yaanona ayihe oshowo omahala goku ningilwa iituthi yomaludhi agehe,” ta ti ngaaka. Ta gwedha po kutya ehala ndyoka otali ka yambindhindha aakalimo yOngwediva oyendji oshoka oya kondwa omagulu okuya ko kule.
Ta ti oproyeka ndyoka itayi popi ashike omayinyanyudho ihe otayi ka e ta wo ompito yiilonga moshigwana.
Shayefu okwa popi kutya ondoolopa ngele oyina omahala gatya ngaaka ohayi hili wo aatelelipo oshowo aanangeshefa ya yooloka shoka tashi tashi ka kokeka eliko lyondoolopa yOngwediva.
vkaapanda@nepc.com.na