Hidridis Festus gomimvo 64, okwa sindana ongomukulukadhi dhingi sho a li i itanga nokuulika omazimo osho wo omuthigululwakalo gwe nawa. Festus okwa thigathana methigathano ndyoka lyomukulukadhi gwomalenga dhingi, lyali ko mehuulilo shiwike komauliko gomazimo kokapale kOshakati.

Elise Ihuhua (42) okwa sindana omukulukadhi omutiyali omanga Hilde Salomo (35) a sindana omutitatu.Ngoka a li a kwatela komeho omathigathano ngoka Maggy Embashu okwa ti, omathigathano ngoka ogo ga li gotango okuningwa moNamibia alihe.
“Omathigathano ngaka oge ende nawa ngaashi naana kwa li ga longekidhwa. Mboka ya sindana oya li ya ndhindhilikwa yu ulika uunongo wokutangumuna omazimo, omizalo dhOshiwambo osho wo okuulika omithigululwakalo,” ta fatulula ngaaka.

Ta ti, opo ya sindane oya  talika unene kokutangumuna omazimo nomihoko dhawo osho wo okuyamukula omapulo ya pulwa.

Nambahu  okwa ti, ngoka a sindana omukulukadhi dhingi okwa mona omagano goshimaliwa N$5 000, omutiyali N$3 000 nomutitatu okwa mona N$2 000.
Ta fatulula kutya oya tula po ashike oshimaliwa shoka, oshoka omathigathano ngoka opo taga ningwa lwotango, opo ya mone kutya aakulukandhi yangapi haya kala yena ohokwe nomathigathano ngoka.
“Sha ikolelela komwaalu gwaakuthimbinga, molweetho olutiyali oshimaliwa tashi ka sindanwa otashi gwedhelwa,” ta ti ngaaka.

Nambashu okwa popi kutya nuumvo oye ya po nomathigathano gaakulukadhi dhingi oshoka ihaye ya pe ompito ihe ohaya gandja ashike kaanyasha, nonando oshiindingili ohashi kala shi na sha nomithululwakalo.
Ta ti, moshikando tashiya otaya ka pititha uuyelele kuna ethimbo okuninga opo kehe ngoka a hala oku kutha ombinga a ninge omayindilo.

-vkaapanda@nepc.com.na