Auleria Wakudumo
Eelelo lodoolopa yOngwediva, ola kunghilila ovanangeshefa, ovatalelipo osho yo ovakalimo vomOngwediva aveshe opo ve liufe keemhango nomilandu doveta yomaweelelo mokati kovanhu nomodoolopa.
Omushangwa woikundaneki wa dja komukulunhuwiliki wodoolopa Damian Egumbo owa holola kutya elelo lodoolopa ola didilika eweelelo la pitilila okudja moivilo nomomangudumano a yooloka modoolopa.
“Ohatu dimbulukifa natango ovakalimo vetu eemhango odo ve na okulandula okukwashilipaleka kutya ova kaleka po ombili nokushikula eemhango adishe da tulwa po kelelo lodoolopa,” Egumbo ta ti.
Ovakwashiwana otava indilwa opo va shikule eemhango tadi shikula.
Keshe ou ta ningi oshitufi shonhumba, tashi kala shi na eweelelo la pitilila na shiivifile elelo lodoolopa manga ina hovela oshitufi shaye.
“Eshi inashi kwatela mo okuhangana kovanhu ponhele yonhumba, omalwiimbo ovashikingalo, omambo ongeleka, osho yo omunhu ta popi kembako, a shiivifile oshiwana oshinima shonhumba,” Egumbo ta ti.
Nonande oitufi imwe ya pitikwa okuninga omaweelelo modoolopa, Omukulunhuwiliki okwa ti omaweelelo aeshe naa kale e li pedu, itaa dulu okupendula mo mushiinda shoye.
Egumbo okwa ti omaweelelo aeshe, mwa kwatelwa eengalo naa kale a shunifwa pedu okudja po 22h00.
Elelo lodoolopa ola holola yo kutya omilandu edi tava shikula adishe oda dja keeveta doshilongo odo ovanhu aveshe ve na okuliufa kudo.
Oveta yomalelo edoolopa, okatendo ka23 ko1992 oya yandja eenghono komalelo edoolopa opo omalelo edoolopa a tule po eemhango ngeenge tashi ya keweelelo.
Oveta hai ifanwa oEnvironment Management, okatendo 7 ko2007 oya indika oohandimwe osho yo eengeshefa okuninga eweelelo la pitilila olo tali dulu okupiyaaneka ovanhu vakwao.
“Onghene ohatu indile ovakalimo aveshe opo va landule omilandu edi opo tu kaleke eweelelo pedu modoolopa. keshe ou ta ka tauluka omilandu edi ota ka mona ehandukilo okudja kelelo lodoolopa,” Kashihakumwa ta ti.