ENDOLA – Aalongwa yoposikola yopaumwene Simon Amutenya mEndola moshitopolwa shaHangwena oye li momagumbo sho anuwa osikola yawo ya patwa oshoka oyi na oongunga dhetungo.

Osikola ndjoka ya kala nokulonga omimvo ndatu paife, oyi na okuza oshikunino sigo ondondo ontintatu.

Aakuluntu otaya nyenyeta kutya aanona yawo oya kala pomagumbo okuza omasiku 11 gaApilili sigo onena, sho ya kala anuwa taya lombwelwa kutya otaya tseyithilwa kutya uunake aanona taya shuna kosikola, pwaa na etompelo lya gwedha po. 

Omuvali gumwe e shiwike kuKundana ota nyenyeta kutya opo ya lombwelwa ya kongele aanona oosikola dhimwe, oshoka osikola oya pata, ihe kape na iizemo nenge iitsa tayi ulike iilonga yaanona yomumvo nguka.

“Uuyelele opo twe u uvu kutya osikola oyi na oondjo dhetungo, onkene iinima ayihe oya patelwa mo, mwa kwatelwa iilongomwa yaanona osho wo iikutu niikwathitho yawo,” tanyenyeta ngaaka.

Ta ti, paife otashi ya pula oku ka landulula iikwathitholongo osho wo iinguma niizalomwa yilwe. Natango omukuluntu gumwe okwa nyenyeta kutya otaya shunithwa ko koosikola dhimwe oshoka aanona kaye na iitsa yoku ya taambitha.

“Oosikola otadhi taamba aanona sha ikwatelela koshike? Otu li nale muJuni. 

Nonando onda ti okanona oku uka mondondo ontine, omanga ka li mondondo ontintatu, otaya patanake ndje sha ikwateela koshike,” ta pula ngaaka. 

Ooyene yosikola ndjoka Simon Amutenya naFiina Aludhilu oya kwashilipaeke epato lyosikola omolwoongunga ye na, ndhoka kaya li itaaya vulu okutotha mo. 

“Onda li nda indile mwene gwetungo opo a kwathele ndje ndi kuthe mo iinima yaanona, omanga tandi kambadhala okufuta ko oondjo ndhoka dhi li ko ihe okwa tindi,” ta popi ngaaka.Onkambadhala yaKundana okupopya namwene gwetungo oya hulile muunyengwi.

Nonando ongaaka, gumwe e na uuyelele wi ihwa po okwa popi kutya mwene gwetungo okwa li a lundulula omakumba, konima omukuluntu gwosikola a ndopa okugwanitha po euvathano ya li ya tula po kutya uuna ethimbo lye lyokuza mo tali thiki, ne shi tseyithe omanga ku na omweedhi ndatu.

“Mwene gwosikola okwa li ashike a laleke omwe dhi ngoka ta yi, omanga e na oongunga, shoka sha etitha mwene gwetungo a patele mo iinima ye,” ta fatulula ngaaka

Uuministeli welongo owa pititha omushangwa opo uunona mboka wu vule okutaambwa koosikola dhi li momundhingoloko. 

Omukuluntu gwelongo moshitopolwa shaHangwena Isak Hamatwi okwa ti oya tokola ngaaka opo uunona wu tameke oosikola. “Otwa indile oosikola ndhoka dhi li popepi opo dhi taambe uunona mboka. 

Ngoka a hala okanona ke ka ye koosikola dhimwe , kiitopolwa yilwe shoka kashi li miikaha yetu,” ta fatulula ngaaka.

Hamatwi ta gwedha po kutya okwa kumagindha omukuluntu gwosikola ngoka a gwanithe po shoka a li uvaneka kombinga yokufuta oongunga ndhoka, ihe otashi ulike a fa a ndopa oku shi ninga.

Ta ti, sha ikwatelela koompango dhelongo ngele osikola oya kala itaayi longo ethimbo sigo omweedhi hamano, otayi patwa sigo aluhe.

-vkaapanda@nepc.com.na