Ovanafikola hava fikola kofikola Shingunguma Primary School otava ende momeva pefimbo loutalala opo va dule okufika keetundi. 

Omukulunhufikola pofikola Shingunguma Primary School, Grace Musheko okwa ti osha nyika oshiponga eshi ovanafikola tava ende momeva pefimbo eli loutalala u li metifa molwaashi otashi eta ovanafikola va kwatwe koshidu. 

“Otwa didilika ounona vamwe ve li meendodo dopedu hava kala tava kakama ngeenge ve li meetundi molwaashi ova tauluka omeva,” Musheko ta ti. 

Musheko okwa ti oshi li eshongo linene kovanafikola ve li mondodo onhi-7 molwaashi fiyo opapa inava shanga omakonakono oo a shangwa kovanafikola vakwao shaashi okwa li ve li komaumbo molwefundja. 

Okwa weda po ta ti oshi li eshongo linene molwaashi ovanafikola vondodo onhi-7 itava dulu okuninga omaindilo okuya kondodo onhi-8 momudo tau ya. 

Okwa ti ofikola yaye okwa li ya pata omwedi Apiilili molwaashi okwa li i li koshi yomeva ashike opo va tameke eetundi Omaandaxa oshivike eshi. 

Okwa didilikwa efimbo eli ovanafikola ve li mondodo onhi-7 ve lipyakidila okuninga omaindilo okuya kondodo onhi-8 momundo tau ya. 

Ofikola Shingunguma Primary School oi li momukunda Eengava moshitukulwa shaHangwena. 

Neudo eefikola koitukulwa ngaashi Ohangwena, Omusati nOshana okwa li da pata molwonghalo yefundja. 

Omukulunhuwiliki wehongo moshitukulwa shaHangwena Isak Hamatwi okwa ti ota ka kwatafana nomukulunhufikola pofikola Shingunguma Primary School opo va kundafane kombinga yovanafikola va ye mefudo natango. 

“Ovanafikola otava ka ya mokafudo fiyo omeva taa pwinine molwaashi osha nyika oshiponga ounona ve li meendodo dopedu tava tauluka omeva pefimbo loutalala,” ta ti. 

Hamatwi okwa ti eefikola dimwe itadi i mefudo molwaashi ovanafikola otava futile po efimbo olo kwa li ve li komaumbo molwonghalo yefundja. 

Okwa yelifa ta ti ofikola ashike Shingunguma Primary School i na natango eendjila da talama omeva. 

Okwa kumaida ovahongifikola ovo tava longo keefikola odo kwa li da pata komeva opo va longe nelitulemo mefudo nelalakano lokuwanifa po oinyangadalwa yovanafikola oyo i li konima. 

Umwe womovadali ve na okaana ke li mondodo onhi-7 pofikola Shingunguma Primary School okwa nyenyeta ta ti ounona wavo otava kala ve na oupyakadi wokutambulwa kondodo onhi-8 molwaashi natango otava i mefudo molwomeva. 

“Pefimbo tava ka dja mefudo otava ka hanga omaindilo ondodo onhi-8 a xula nale. Oshi li eshongo linene la taalelwa kounona vetu,” ta ti. 

Okwa pula ombel ewa yomukunhuwiliki opo i ninge omalongekido opo ovanafikola ve li mondodo onhi-7 va ka longelwe kofikola oyo i na omuhandjofikola pefimbo lefudo molwaashi eefikola otadi fuda momafiku 13 Juni. 

Hamatwi okwa nyamukula ta ti ota ka kundafana nomukulunhufikola , omutalelishikandjo wehongo kombinga yoshikumungu shovanafikola vondodo onhi- 7 va ka longelwe kofikola i na omuhandjo. 

-fhamalwa@nepc.com.na