Ehangano lyoRossing Foundation olya yambidhidha ombelewa yoshitopolwa shaShana noN$500 000 okukwathela mboka ya gumwa unene koshikukuta.

Ehangano olya ti olya yambidhidha ngaaka opo mboka ya gumwa unene koshikukuta shoka sha li sha taaleela oshitopolwa ya mone omayambidhidho.

“Omumvo gwa zi ko omupresidente gwoshilongo ethimbo ndyoka okwa li a pititha kutya oshilongo nashi mone omayakulo gosheendelela omolwoshikukuta sha yaga kesipa, shoka she tu pe omadhiladhilo opo tu yambidhidhe ngeyika,” ehangano tali ti momushangwa ngoka lya pititha.

Ta ti, oshitopolwa osha totha mo iikandjohogololo mbyoka ya gumwa unene mOshana ngaashi Okatyali, Uukwiyuushona, osho wo Uuvudhiya.

Taya ti, sho ya talele po omikunda dhimwe omasiku ngaka, oya kwashilipaleke kutya ondjala kayi ko.

“Omvula oya loka nawa, omapya oga za iilya, niimuna otayi monika nawa komalutu. Enota nuumvo kali ko, iishana oyu udha omeya,” ya shanga ngaaka.

Omukuluntu moombelewa dhoshitopolwa shaShana Teopolina Hamutumua okwa ti okwa pandula sho ya yambidhidhwa nomakwatho ge thike mpoka.

“Shika oshi vulithe po puukuume tu na nehangano lyoRossing Foundation. Otatu ka gandja omakwatho kwaamboka ye li lela mompumbwe opo tu kandule po ondjala moshitopolwa shetu,” ta popi ngaaka.

Ta ti, omakwatho ngoka otaga ka longa oshilonga sha simana sho taga ka kandula po ondjala moshitopolwa.

Hamutumua okwa popi wo kutya oya li ya shaina etsokumweuvathano pokati kawo nehangano lyoWorld Food Programme osho wo University of Namibia nelalakano lyokukandula po ondjala moshitopolwa.

Kansela gwoshitopolwa shUuvudhiya Timoteus Shivute esiku ndyoka okwa li a pandula ehangano lyoRossing Foundation omolwonkatu onene lya kutha oku ya yambidhidha opo ya vule okuhupitha aakalimo yawo.

“Otse aanelago oshoka otwa mono omayambidhidho ge thike mpoka, onkene otatu kwashilipaleke kutya oyendji ya gumwa koshikukuta otaya mono ko koshikuki,” ta pandula ngaaka.

Ta ti, okwa pandulile ko wo aakalimo mboka tayaka yambidhidhwa.

-vkaapanda@nepc.com.na