OKAHAO – Ngoloneya woshitukulwa shaMusati Erginus Endjala okwa pula omalelo eedoolopa opo a kale taa longele nokukwatafana ngeenge taa ningi oivilo yomaulikilo oipindi nelalakano lokukelela omaulikilo oipindi taa ningilwa oshita.
Okwa ti osha fimana opo odoolopa i kale ya tula po omafiku okuninga omaulikilo oipindi ndele haku ninga oshita needoolopa dikwao.
Edi Endjala okwe di popya Omaandaxa kepatululo pambelewa omaulikilo oipindi kodoolopa yaKahao moshitukulwa shaMusati.
Paife ngaha oshi li oshikando oshitine Okahao ta ka ningi omaulikilo oipindi e li kombinga yomifyuululwakalo.
Ovaleli vopapolitika, ovanangeshefa vakula novashona nosho yo ovaleli vopamufyuululwakalo okwa li va holoka momwaalu muhapu kepatululo pambelewa lomaulikilo oipindi.
Endjala okwa li ta popi e likwatela kombinga eshi kOutapi ku na oshivilo shOlufuko osho sha tameka mefiku limwe lomaulikilo oipindi kOkahao oo nawo e li metifa.
Minista wouyuuki noipambele yoilonga Fillemon Wise Immanuel ou kwa li ta lesha oshipopiwa ponhele yOmupresidente Netumbo Nandi-Ndaitwah okwa ti omaulikilo oipindi okwa fimana molwaashi otaa etele oshiwana oyuuyemo nosho yo okuyambula po eedoolopa.
Immanuel okwa pula omalelo eedoolopa ngeenge taa ningi omaulikilo oipindi opo a kale taa shiva ounona novanyasha nelalakano lokulihonga kombinga yomangeshefelo.
Okwa ti omaulikilo oipindi yopamifyuululwakalo okwa fimana kounona novanyasha molwaashi otaa yandje ehongo leenghedi dOshiwambo.
“Omaulikilo oipindi naa pule komesho shaashi otaa etele ovanyasha eemhito doilonga,” ta ti.
Minista natango okwa pula elelo lodoolopa yaKahao opo li tote po oshikondo shoumayola vounona ngaashi naana omalelo amwepo a yandje eemhito kounona va ninge omayola.
Odoolopa yaNdangwa nayo otai ka ninga omaulikilo oipindi oo taa tameke momafiku 27 Juni.