OUTAPI – Oshiwana osha pandula eshi sha mona omhito yokulandifa oilandifomwa yavo koshivilo shOlufuko osho sha tameka oshivike sha dja ko kOutapi moshitukulwa shaMusati. Ovanangeshefa ve dulife 40 nosho yo omahangano a yooloka otava kufa ombinga momauliko oipindi kendiki kOlufuko. Olufuko ola tamekele momafiku 27 Juni notali ka xula mefiku 1 Juli. Ndahambelela Kashimulu weedula 73 a dile kOndangwa okwa ti oipindi otai ende nawa okudja efiku lotete. 

Okwa yelifa ta ti oha xupu ashike mongeshefa yaye yokulandifa oilandifomwa yOshiwambo ngaashi oikulya, omatiti, oimbale nomaholo. 

“Ohandi landifa komaulikilo oipindi keedoolopa da yooloka keshe omudo. Onda pandula omalelo eedoolopa eshi taa twikile nokuninga omaulikilo oipindi shaashi ohatu mono omhito yokulandifa oilandifomwa yetu,” ta ti.Kashimhulu okwa ti ngeno omalelo eedoolopa ihaa ningi omaulikilo oipindi ngeno ihava mono omhito yokulandifa. 

Okwa ti ongeshefa yaye oye mu etela omauwa ngaashi okufutila ounona vaye ofikola nosho yo okulanda oipumbiwa yomeumbo. “Ohandi kwata opendjela ashike inandi hala okukala meumbo handi xupu moshimaliwa shopendjela. Onda kufa onghatu yomondjila opo ndi ka landife komaulikilo oipindi,” ta ti. Lukas Hanghome weedula 28 ta landifa oikolwifa nokapana okwa ti ei oyo omhito iwa okukala a longa oshimaliwa shihapu molwaashi ovanhu otava holoka momwaalu muhapu okulanda. 

“Efimbo lokomatango ohandi yakula ovanhu vahapu pokatala kange. Onda pandula unene komhito ei,” ta ti. 

Ovanangeshefa ova nyenyeta tava ti kave udite ombili molwaashi mendiki lOlufuko kamu na sha eembaanga dokunana oshimaliwa. 

-fhamalwa@nepc.com.na