ONGWEDIVA – Elenga lipe loshikandjo shaMhedi Meryam Nangeda Heita-Kautwima okwa ti ota ka longela kumwe nopolifi okulwifa oumbudi woimuna moshikandjo shaye. 

Kautwima okwa nangekwa pambelewa Olomakaya pefimbo loshivilo sha li keumbo laye kOngha moshitukulwa shaHangwena. 

Kautwima okwa ti moshikandjo shaye omu na ovanhu tava vake po oikombo yavakwao ndele tava landifa okapana. 

“Osha puka ngeenge ovanhu tava vake po omaliko avakwao. 

Ovanhu nave li longe l e okulimonena oipalwifa yavo ndele hakuvaka,” ta ti. 

Heita-Kautwima ta ti ombelewa yaye otai ka tota po omaanda oilya nelalakano lokuyambidida ovanhu ve li momhumbwe yoikulya. 

Okwa weda po ta ti ovanhu ovo tava ka kala ve li momhumbwe yombuto yokukuna navo otava ka pewa omakwafo okudilila momaanda aa.

Paife moshitunda shaUkwanyama omu na omalenga ovakainhu e li ane moikandjo ngaashi Omhedi, Omungwelume, Okongo nosho yo Efululula. 

Naashi otashi ulike kutya elelo laUkwanyama otali shi endifa nawa okulongifa oufikepamwe mewiliko. 

Okwa pula oshiwana opo shi kale shi na elongelokumwe nombelewa yaye nosho yo ekwatafano liwa. 

“Onda hala ovanhu va kale nombili noukumwe moshikandjo shange,” Heita-Kautwima ta ti. Ovanyasha nava fimaneke ovakulunhu nosho yo okulikaleka kokule nokulonga oimbuluma. 

Omunashipindi welelo laUkwanyama Eliasa Waandja ou a lesha oshipopiwa shOhamba okwa ti elalakano lokutula omalenga koikandjo opo a wilike nokutula po elandulafano koikandjo yavo. 

Heita-Kautwima okwa lombwela oshiwana opo shi kale tashi liufa komilandu da tulwa po kelelo nosho yo okufimaneka ovaleli vavo. 

Okwa kumaida oovene vomikunda opo va yakule nawa nosho yo okukaleka po ombili neameno momikunda davo. 

-fhamalwa@nepc.com.na