OUTAPI – Maria Shiponeni, Namunganga kOlufuko okwa yelifa ta ti Olufuko kali fi oupaani ndele otali kaleke po efimano lomifyuululwakalo neenghulunghedi dOshiwambo.
Meenghundafana va ninga naKundana onghela kendiki lOlufuko Shiponeni okwa hokolola ta ti osha fimana ngeenge oukadona tava fukala molufuko shaashi oyo ondjila hai endwa pamufyuululwakalo okudja koukadona.
Oshivilo shOlufuko osha tamekele momafiku 20 Juni notashi ka xula efiku 1 Juli.
Ovafuko 145 va kufa ombinga kOlufuko ova kwatela mo ovanafikola, ovalihongi koiputudilo yopombada ya yooloka nosho yo ovanashilonga.
Olufuko otali ka patululwa pambelewa mongula komupilima Elijah Ngurare.
Shiponeni okwa yelifa ta ti okaadona inave uya okukonga ovalumenhu kOlufuko ashike ove uya okupewa ehongo kombinga yefimano lomufyuululwakalo.
Okwa weda po ta ti ounona voukadona otava shuna kofikola konima ngeenge va fukala shaashi ofikola oya fimana.
Okwa ti oshiwana nashi xulife po okutandaveleka oipupulu kutya oukadona ova ka pewa ovalumenhu.
Edi okwe di popya e likwatela komapopyo oipupulu kutya oukadona otava ningifwa oinima youpaani kOlufuko. Shiponeni okwa ti olufuko ofikola tai yandje eetundi koukadona nghene ve na okulihumbata fiyo va ninga ovakainhu voshili.
“Olufuko ola etela ounona vetu voukadona ouwa molwaashi ounona vahapu ohave lihumbata nawa konima yokufukala,” ta ti.
Shiponeni okwa ti oilonga yaye ongaNamunganga okutala ngeenge oukadona ove na omateelelo nosho yo okutala ngeenge otava wanifa po oinyangadalwa oyo tava ningi pefimbo lokufukala.
Okwa weda po ta ti ovafuko ohava ningi oinyangadalwa ya yooloka ngaashi okudunga omalodu, okutwa oilya nongava nokukolonga poshipale nosho tuu.
“Ame nda tema omundilo tete meumbo lOlufuko omu. Omundilo owa fimana molwaashi otau eta po elandulafano pefimbo loshivilo shOlufuko,” ta ti.
Wilka Tuhafeni weedula 23 e lihongela ouhongifikola koshiputudilo shaUnam okwa ti kOlufuko okwe ya ko sha dja kehalo laye molwaashi okwa fimaneka omufyuululwakalo waye.
“Onda hafa eshi handi kufa ombinga kOlufuko shaashi mekulu okwa hongange kutya ka shiwa ngeenge okakadona kamita tete ina ka hombolwa,” ta ti.
Okwa weda po ta ti ina hala okuninga ehengu ashike okwa fimaneka elombwelo lainakulu.
Okwa fatulula ta ti ehengu omunhu ou a mita ina hombolwa.
Hilma Shilongo weedula 30 naye ta kufa ombinga ha longo ofikola yoshikunino okwa ti ovanhu ohava popi omahokololo oipupulu kutya olufuko oupaani osho shi li sha puka.
“Okudja etameko lOlufuko inandi mona mo ovanhu tava longifa oupaani. Elalakano letu okuya kOlufuko okulongwa eenghulunghedi dOshiwambo,” ta ti.
Okwa kumaida oshiwana opo shi xulife po okupopya omahokololo oipupulu kutya olufuko oupaani.
“Onda hafa shaashi inandi hala okulengifa ovakulunhu vange ashike paife ova hafa shaashi onda fukala ngaashi naana navo osho va ninga,” ta ti. -fhamalwa@nepc.com.na