Omulumenhu weedula 28 okwa mona oshiponga eshi vati a lika kombuda kondjabameva pefimbo kwa li ta kwata eeshi.
Oshiningwanima osha ningwa Osoondaxa efimbo lokonguloshi komulonga Bunya koshitukulwa shaKavango West.
Omukulunhu wopolifi moshitukulwa shaKavango West Commissioner Julia Sakuwa-Neo okwa hokolola ta ti omulumenhu ou okwa monifwa oshiponga kombuda shaashi okwa ninga oipute.
Nakuninga oshihakanwa okwa li a twalwa koshipangelo shaBunya ta mono epango lopaunamiti ashike paife okwa lekelwa.
Opolifi oya hokolola tai ti pefimbo omulumenhu ta kwata eeshi ondjabameva oya dilila konima ndele tai mu nukile kombuda. Otaku hokololwa kutya nakuninga oshihakanwa okwe shi pondola okufaduka po no nande a monifwa oshiponga
Okwa didilikwa pomulonga Bunya pe yadi eendjabameva neengadu di hole okukala komukunghulo womulonga osho shi li sha nyika oshiponga.
Opolifi oya kumaida oshiwana opo shiha kwate vali eeshi momulonga shaashi omunhu ota dulu okumonifwa oshiponga ile a dipawe.