Omulumenhu weedula 34 okwa kwatwa po konima eshi vati a lotokela ponhele pa kandomena eetuwa ndele ta vake po omaliko oonakumona oshiponga mwa kwatelwa ongodi. Oshiningwanima osha ningwa Osoondaxa efimbo lomutenya komukunda Ohameva moshitukulwa shaHangwena. Nakuninga oshinima eshi ota holoka momhangulilo yaMangestalata waKongo nena. 

Omupopiliko wopolifi moshitukulwa shaHangwena Warrant Andreas Nghiyolwa okwa ti moshiponga omo omwa ehamena ovanhu omuwoi, va li meetuwa mbali odo de lidenga mumwe. Ouyelele woumbudi womaliko oihakanwa moshiponga owe uya kombada eshi omulumenhu a monika te lishiti e na ongodi yoIphone momukunda. Oonakuninga oihakanwa ova tambulilwa moshipangelo shEenhana tava mono epango lopaunamiti omanga vamwe ova lekelwa mo moshipangelo nale. 

Opolifi oya hokolola tai ti kape na omunhu a lopotwa a xulifila poshiponga. 

Warrant Nghiyolwa okwa ti ovapolifi ova ninga oihakanwa yokulundilwa kutya ohava vake po omaliko ovanhu ngeenge tava fiki poiponga. 

“Otwa didilika ovanhu ngeenge va ninga oihakanwa yokuninga oiponga meetuwa hava nyenyeta omaliko avo a kana osho sha eta ku tiwe ovapolifi,” ta ti. 

Okwa ti paife otashi ulike kutya ovakwashiwana ovo hava fiki tete poshiponga ovo mboli hava vake po omaliko oshiwana. Okwa yelifa ta ti opolifi itai ti kutya ovakwashiwana inava fika poshiponga ashike eshi sha fimana opo vaha kwate omaliko ovanhu. 

“Omukwashiwana ngeenge a fika poshiponga okwa pumbwa okudengela opolifi,” ta ti. 

Okwa kumaida oshiwana opo shi xulife po okukufa omaliko ovanhu ngeenge sha fika poshiponga shaashi omunhu ota dulu okukwatwa po. 

Nghiyolwa okwa ti havanhu aveshe hava kala va mona oshiponga neenghono shaashi ovanhu vamwe ohava kala ve wete ko kutya olyelye ta kufa po omaliko avo. 

-fhamalwa@nepc.com.na