Ngoka a li ngoloneya gwoshitopolwa shaHangwena Sabastian Ndeitunga esiku a thigi po iilonga ye okwa ti oshitopolwa osha taalela uupyakadhi wonkalo yokwaa na iilonga, unene mokati kaanyasha. 

Ngoloneya okwa popi ngaaka mOmaandaaha kEenhana sho kwa li ta laleke oshigwana, sho ethimbo lye miilonga lya thiki pehulilo. 

Iilonga ye oye ya pehulilo sho kwa li oongoloneya ya gwedhelwa ko omasiku 10, konima ya li ye na okwiihula miilonga momasiku 20 Juni nuumvo. 

Ta ti, oshitopolwa shaHangwena osha taalela okwaa na iilonga ku li pombanda okweeleka niitopolwa ayihe moshilongo, noopelesenda 52,8. 

“Sha ikwatelela komayalulo goNamibia Statistics Agency (NSA), momumvo 2023 oshitopolwa shaHangwena oshi na aantu ye thike po52.8% yaa na iilonga nuunene aanyasha ye li oopelesenda 44,4,” ta popi ngaka. Ndeitunga ota ti, onkalo ndjoka otayi limbilike, noya nyayipalekitha onkalo oshoka aanyasha oyendji oye li momapandaanda. 

Ta gwedha ko kutya ngele aanyasha oyendji yaa na iilonga ohashi iindjipaleke iimbuluma osho wo ondjala nokupiyaganeka omadhiladhilo gawo. 

“Methimbo lyandje lyomvula yimwe noomwedhi heyali nda kala nokulonga, onda kambadhala mpoka tandi vulu okulundulula onkalo, ihe ope na yimwe inaayi pwa okulongwa natango,” ta popi ngaaka. 

Ndeitunga okwa popi kutya oshitopolwa shOhangwena natango osha taalela uupyakadhi womeya inaaga yela, oondjila dhaali nawa, osho wo omakuthikuthi gopangodhi gaa li nawa. 

Ta ti okwa inekela kutya ngoka ta ka kutha po ompito ye otaka longa nuudhiginini opo oshigwana shi tyapule uuwanawa woshilongo shika. “Oshitopolwa shaHangwena oshi li koongamba dhaAngola naNamibia, shi na ompito ombwaanawa okuninga oongeshefa ndhoka tadhi vulu okuyambula po nokuhumitha komeho oshitopolwa shika,” ta ti ngaaka. 

Ta ti epangelo olya kala nokulonga nuudhiginini okuhwepopaleka onkalo yoongeshefa. 

-vkaapanda@nepc.com.na