Onkalo yokanona komimvo heyali hoka ka kala ka taalela onkalo ondhigu sho ka hupu medhipago lyi nyanyaleka ndyoka lya faalele oomwenyo ndatu dhaakwanezimo noku ka thiga nokugulu kumwe, oya hwepopalekwa sho ka yambidhidhwa nokatemba okape.

Rejoice Gift Petrus okwa kala monkalo ondhigu, iha ende ye iha popi, nuuna a hala oku ka dhana kuyakwawo oha galangata, noha shi pula ethimbo opo a thike mpoka ta yi.

Konima oshifokundaneki shika kwa li sha nyanyangidha ehokololo lyaPetrus, omunangeshefa Simon Kadhila okwa li a gumwa konkalo ye e te mu landele okatemba okape kopashinanena. Omukwatakanithi nomuhwahwameki goshikonga shokukwathela Petrus, Simon Kondjashili, a tseyika nedhina Mapeni Protocol okwa ti okwa pandula Kadhila sho a yambindhindha okanona hoka.

“Ngashiingeyi oshigwana oshi li metifa okugongela oshimaliwa okuza moshigwana opo Petrus a ka mone okugulu kopaunongononi osho wo a ka mone omadheulo gopalutu koWindhoek,” ta fatulula ngaaka.

Ta ti kehe ngoka a hala okuyambidhidha Petrus na dhenge konomola 081 875 8288 

Ta hokolola kutya Petrus okwa li e na omimvo mbali sho hekulu Sam Nauyoma Petrus (a li e na omimvo 26 pethimbo lyoshininganima) ngoka a valwa nayina a ponokeke nokudhipaga aanegumbo yaandjawo mwa kwatelwa yina, mumwayi gwomumati, omutekulu gwe e ta monitha oshiponga Petrus. 

Okuza mpoka okwa dhipaga okambwa e ta yi koshinyongo e ta dhipaga iikombo iheyali. 

Iilonga ayihe mbyoka okwa li e yi longo nekatana pomukunda Okatope moshitopolwa shaHangwena. 

 “Okanona hoka otaka tekulwa ashike puushinda, oshoka egumbo lyawo olya pata, yina ngoka a hupu ko opamwe nomumwayinakadhona gumwe ihaya kala po kegumbo oshoka oyu uvite kutya kegumbo kaku na ombepo ombwaanawa,” ta ti ngaaka. 

Kondjashili okwa ti okanona oke li muundjolowele wu li nawa kakele kuulema mboka wa dhigupaleke onkalamwenyo yako.

-vkaapanda@nepc.com.na