Oongoloneya aape ya hogololwa Etiyali kOmupresidente Netumbo Nandi-Ndaitwah oya ti otaya ka longa nuudhiginini notaya ka  tsikila okulonga mpoka pwa hulilwa kwaamboka ya zi ko okuhumitha komeho iitopolwa yawo.

Oongoloneya aape oyo, Pijoo Nganate gwOmaheke, Kadiva Diana Hamutumwa gwOhangwena, Hofni Iipinge gwOshana, Natalia Goagoses gwErongo, Dorothy Mareka-Kabula gwoZambezi, David Gertze gwoǁKharas, osho wo Immanuel Shikongo gwOmusati.

Mboka oya gwedha oongoloneya ya li ya hogololwa nuumvo muMaalitsa, mbaka oyo: Sam Shafiishuna Nujoma gwoKhomas, Vipuakuje Muharukua gwaKunene, Sacky Kathindi gwOshikoto, Verna Sinimbo gwoKavango West, Hamunyera Hambyuka gwoKavango East, RiaanCharles McNab gwoHardap osho wo John Julius ||Khamuseb gwoTjozondjupa.

Nandi-Ndaitwah okwa kunkilile oongoloneya ya ka longe nuudhiginini yo ya itule mo miilonga yawo ngaashi naana yi na okulongwa.

“Tamekeni nooproyeka dhongushu miitopolwa yeni opo mu vule okukandula po oompumbwe dhiilonga osho wo omaupyakadhi ga yooloka ga taalela iitopolwa,” ta kumagidha ngaaka.

Hamutumwa okwa popi kutya ota ka  longa pamwe naanyasha ye na iitalendi ya yooloka, uunamapya, eetepo lyiilonga osho wo ehumokomeho.

“Otandi indile wo aakalimo yomOhangwena opo tu longeleni kumwe tu yambulepo nokuhumitha komeho oshitopolwa shetu,” ta popi ngaaka. 

 Nganate okwa pandula sho a pewa ompito yokulela oshitopolwa, ta ti, otaka longa nuudhiginini opo a humithe komeho oshitopolwa shOmaheke.

“Omanga nda kala tandi kondjitha okuhwepopaleka onkalo yondjala okupitila muunamapya, iilonga nosho tuu, ethimbo opaife oku yi tula miilonga,” ta popi ngaaka.

Kabula okwa ti, tango ota tula miilonga uunamapya, omapashiyono osho wo eetepo lyiilonga.

“Oshitopolwa shaZambezi oshi na evi ewanawa nomeya okuza momulonga onkene out na oku yi longitha opo tu kandule po uupyakadhi wa taalela oshitopolwa shetu,” ta ti ngaaka.

Shikongo okwa ti, ota ka tula miilonga omalongo osho wo iigongi naaleli ya yooloka moshitopolwa shaMusati opo ya kale taya kundathana nkene ye na okukandula po omaupyakandhi ga taalela oshitopolwa.

“Oshitopolwa osha taalelwa komaupyakadhi ga yooloka, ngaashi gokwaa na oondjila, iipangelo, oosasiona dhopolisi, omakuthiikuthi niikwawo oyindji,” Shikongo ta totha mo ngaaka.

Gertze gwo||Kharas okwa ti oshitopolwa osha taalela unene uupyakadhi wevi, shoka sha etitha wo ondjala moshitopolwa.

Ipinge okwa ti ota ka longa nuudhiginini opo a gwanithe po ayihe ya uvanekwa meuvaneko lyoSwapo.

“Otandi indile aaleli ayehe mOshana opo tu longeleni kumwe tu vule okueta elunduluko nehumokomeho osho wo tu longeleni aakalimo yetu uuwanawa,” ta indile ngaaka.

Goagoses, okwa ti, oshitopolwa shErongo oshi na uuyamba dhoonzo dhuushitwe, onkene ota ka longitha ompito ndjika, okuhumitha komeho oshitopolwa.

“Otandi ka longela kumwe naanangeshefa ya yooloka opo tu gandje ompito kaanyasha ya likole mo wo sha,” ta popi ngaaka. 

 -vkaapanda@nepc.com.na