Ompangu yaMangestrata gwEenhana oya gandja egeelo lyomimvo ntano komulumentu gwomimvo 49 osho wo omukiintu gwomimvo 39 sho ya monika ondjo sho ya dhengagulula nokumanga okanona komimvo 13 e taye ka manga nomalyenge noongodhi momumvo 2020.

Sakaria Shimbili naSusan Nghipitwako, aamwayina yayina yokanona hoka ka li ke na omimvo 13 ethimbo ndyoka ka dhengagulwa, sho anuwa ihaka uvu ko. 

Etitano, omupanguli Helvi Shilemba okwa gandja egeelo, konima omweeti gwiihokolola gwepangelo Pallhus Shuudeni a kala nokwiindika osho wo okugandja omatompelo ga kola omoluunene woshipotha shoka.

Mbaka oya pewa egeelo lyoomvula ntano ayehe, ashike omvula yimwe oya kuthwa ko ya kale inaaya uvikilwa sha sha pamba oshikoya shika muule womvula.

Yina yomumati ngoka okwa li a gandja omatompelo ngoka ga nkondopaleke egeelo kutya uulumentu wokanona ke ihawu thikama we nomakutsi gako ihaga uvu ko sha etwa sho ka dhengagulwa shinyanyaleka omanga ka mangwa nomalyenge kuyinagona nahekulu. 

Ta ti, natango ita dhimine po aamwayina oshoka mumwayinakadhona ngoka, okwe mu tidha mo megumbo moka kwa li haya zi ayehe.

Ompangu oya ti, oshoka oyi lile po okugamena omahepeko momagumbo nuunene okugamena aanona, oya gandja egeelo ndyoka.

Tayi ti, omahepeko gaanona inaga pitikwa nando moNamibia, onkene kehe ngoka ta longo iilonga ngaashi mbyoka oku na okupewa egeelo lya kola.

Oshipotha shoka osha patwa naatamanekwa oya tameke okulongela egeelo lyawo.

-vkaapanda@nepc.com.na