Auleria Wakudumo
ONGWEDIVA – Elelo lodoolopa yaNgwediva ola ongela oshimaliwa shi fike peemiliona N$1.6 kouvalelo wowina wa li ko Olomakaya ponhele yomaulikilo oipindi yaNgwediva.
Ouvalelo owa ningwa nelalakano lokuongela oshimaliwa shokulongifa momaulikilo oipindi aNgwediva (OATF), oo a tengenekwa aka kale ko neudo muAuguste.
Mopaife ngaha oshili oshikando oshi ti-24 elelo lodoolopa yaNgwediva ta li ningi omaulikilo oipindi.
Ovanangeshefa, ovaleli veengudu dopapolitika novaleli vopamufyuululwakalo okwa li va holoka momwaalu munene okuyambidida elelo lodoolopa yaNgwediva.
Ombaanga yoFirst National Bank (FNB) oyo ya yandja oshimaliwa shi li pombada shoN$399 999. Taku shikula ehangano lokuandjaneka omawi momhepo MTC noshimaliwa shi fike poN$350 000.
Ombaanga yoStandard oya yandja oshimaliwa shi fike poN$250 00, omanga oNedbank oshoyo oLucky Bet keshe umwe a yandja oN$150 000.
Omalelo eedoolopa otaa dana onghandangala yakula okuandjaneka omayakulo koshiwana ngaashi omeva, omalusheno komalukanda,okutunga oundhjuwo nokulonga eepate.
Omunashipundi wokakomitiye kokulongekida omauliko oipindi aNgwediva, Rebecca Hidulika okwa holola kutya omaulikilo oipindi aNgwediva okwa hovela novakufimbinga inava fika po100.
Hidulika okwa ti ohava mono omaindilo e dule po1 500 ovanhu va hala okukufa ombinga nomauliko oipindi odoolopa yavo.
“Neudo, ohatu ka kala tuna ovakufimbinga va fika po450, Ovanamibia oshoyo vamwe okudja kondje yoshilongo. Ohatu ka kala tuna ovanhu okudja koGhana, Japan, Indonesi navakwao vamwe va wedwa po,” Hidulika ta ti.
Omaulikilo oipindi yaNgwediva neudo okuli koshi yoshipalanyole “okuuya po nomadilaadilo ape ile okunduluka po sha shipe, okuninga omakwatafano a kola nokuyambula po ongeshefa yoye.
Hidulika okwa holola yo kutya omwaalu muhapu wovanhu va ninga omaindilo okukufa ombinga momaulikilo oipindi inaa tambulwa molwa omhumbwe yeenhele.
Okwa ti onhele yomaulikilo oipindi yaNgwediva oya tungwa nale nonghene oya pumbwa paife okuwedelwa opo va dule okukwatela mo ovanhu vahapu.
“Ongwediva otai dulu ashike okutambula ko ovakufimbinga veli 485. Osho shah ala okutya ovakufimbinga va koya po500 ova shunifwa ko,” ta ti ngaho.