Maticele ba ba sabeleki neba cauzi hape mwa Windoko, kamaikuto akubata kuikopanya ni likwambuyu wa tuto, Sanet Steenkamp. Babafilwe mishukwe mwatuto ba ba sabeleki nebakile bacaula hape la 3 Mbuwana unumwaha hala kutokwa misebezi. 

Kucaula kwa Labubeli hala mutomo otwi ‘mufelise litatubo za kukenywa misebezi za maticele ni pizo ya kukenya maticele misebezi kabuñata hala maticele babafelize lituto babasa beleki,’ nekuboni babafilwe mishukwe babalikana myanda yemibeli haba kubukana hamoho.

Mwangambolo ni Nampa, muinasipula wanaha wakatengo kamaticele babasabeleki, Joyce Liswaniso yana filwe mushukwe kwa sikolo sa Namcol mwasilimo sa 2021, nafitisize pilaelo yahae hala litatubo zakukenya misebezi.

“Lubata kuli litatubo zakukenya misebezi lifeliswe kakuli haliyo hande. Litatubo zeo kizabao feela babaziba batu ni bale babana ni masheleñi akuleka misebezi. Isiñi luna babasina masheleñi. Kibatu feela babaziba batu,” nekubulezi Liswaniso.

Bane bacaula neba bilaezi kuli nombolo yababa ñolanga tatubo ya musebezi ibanga yetuna fokuñwi ifitanga fa 800 kuñolela situlo silisiñwi. Muyemeli yomuñwi wamaticele babasabeleki, Nekulilo Ruben, naize kambe mubuso ukenya maticele babañata, kakuli baituti kibabañata hahulu.

“Baswanela feela kukenya maticele babañata kai ni kai. Kakuli luna ni baituti babañata mwa likolo babatezi mwamakilasi,” nekubulezi Ruben. Yomuñwi yana caula, Denis Kaunda, yana filwe mushukwe kwa sikolo sa Unam, naize saile kwa litatubo zeñata za musebezi kuli mane hasakona kulibala. 

Kaunda nabulezi hape kuli kasamulaho akufiwa mushukwe mwasilimo sa 2021, ukwaeza motikala ya Yango kuli aipilise. Naize mayemo acwale afofaza maikuto abaituti babafilwe mishukwe.

Mubakweli Likwambuyu wa tuto, Dino Ballotti nakile ataha kuli ato amuhela liñolo la linonge, kono bane bacaula nebakile bahana kumutambeka lona mi nebabata kuli likwambuyu kasilibili ato li amuhela.  -Nampa