KATIMA MULILO – Kasamulaho alilimo zesilezi, sicaba si itekezwi ku kamuhela kwa muleneñi wa Masubia, kwa Bukalo, kuyotabela mukiti wa sizo wa Masubia. Ili teñi bakayo bona mulena yomunca wa Masubia, Gilbert Muhongo Mutwa Moraliswani III. Haiba lika inge lizamaya hande mukiti utamehile ku ezahala la 26 Sikulu 2025.

Mukiti ukile watabelwa lwa mafelelezo mwa kweli ya Sikulu 2019, kasamulaho akuzuha kwa butuku bwa Covid-19 mwa silimo sa 2020 ni kutimela kwa mulena wa Masubia, Kisco Maiba Liswani III, ili yana shwile kwa butuku bwa Covid-19 mwa kweli ya Sikulu 2021. 

Sicaba sa Masubia sibile mwa komano ya sipula sa bulena, ili taba yene tisize kuli kusike kwaba ni mukiti bakeñisa kuli nekusina mulena.

Likwambuyu wa Zwelopili ya Libaka za Litolopo ni Matakanyani, James Sankwasa, mwa kweli ya Lungu unumwaha nanyatezi kutalekwa kwa Mulena Mutwa Moraliswani III, kulatelela kuabana fahali kwa lusika lwa silena kuzwelela kwa Bukalo, Ngoma, Kasika ni Mahundu hala kuli kimañi yaswanela kuina falubona.

Muñoli ya Inelezi yana pumuzi famusebezi yana beleka mwalikolo la Babanca, Lipapali ni Sizo, Alfred Ilukena, ili muinasipula wakatengo kaka ongaonga, nanyatezi litukiso za mukiti. “Haiba Mulimu inge alata, luka tabela Mukiti wa Sizo wa Masubia unumwaha. 

Haninze ni bulela ni wena, limemo li lumezwi kwa likhuta kaufela za sizo mwa sikiliti sa Zambezi. Lumemile cwalo nibabazwa mwa buse kwa Mwandi mwanaha Zambia ni Botswana,” nekubulezi Ilukena.

Ilukena naize mukiti ukazwelapili kuba wasilimo kuzwa cwale, sina mone kubelanga kwamulaho, kukuteka sizo ni lindwalume, kunze kusupezwa mikwa ya sizo kakutala ni likezo za kuluta babakaya kwa mukiti. “Batu baswanela kutaha batobona mulena wabona yomunca. 

Kezahalo yene ezahezi kwamakalo a Mbuwana neli kutalekwa feela mi nekusina batu babañata, teñi litaba zabutokwa ni lisebeliso za silena neli tabekilwe,” natolokile.

-Nampa