Auleria Wakudumo
Omuprima woshilongo Elijah Ngurare okwa holola kutya oikulya yoshikukuta otai ka xula okuyandjwa oshilongo ashishe muAuguste neudo.
Ngurare okwa ti etokolo eli ola tulwa moilonga, kwa talwa omuloka woneudo oo wa loka nawa nowa monifa vahapu oipalwifa keembinga adishe doshilongo.
“Omuloka woneudo owa holola kutya vahapu ova mona mo oipalwifa ya wana fiyo okodula tai ya. Omwiidi woulifilo woimuna nao owa tutuma nawa nowa wana okufikifa oimuna komudo tauya,” Ngurare ta ti.
Omuprima okwa ti Omupresidente a dja koshipundi, Nangolo Mbumba okwali a holola kutya oshikukuta nashi talwe ko onga omhumbwe ya kula moshilongo momafiku 22 Mai 2024 e likolelela koArticle 26 kekotamhango loshilongo, okatendo 30 (3).
Eshi osha li sha kolekwa kokabinete opo oikulya yoshikukuta i kale tai yandwa okudja mu 1 Juli 2024 fiyo omo30 Juni 2025.
“Epangelo ola li la tengeneka oikulya yoshikukuta oule wefimbo la tuymbulwa petetekelo i koshe ongushu yoshimaliwa shi fike pobiliona N$1.3,” Ngurare ta ti.
Omuprima okwa holola kutya omaumbo e fike po384 935 hama di ovanhu ve fike pomiliona 1.4 okwali a kumwa koshikumungu shoshikukuta.
Omuprima okwa holola yo kutya epangelo ola yandja ekwafo lopaikulya kovakwashiwana ovo veli momhumbwe, ekwafo kovanafaalama (oikulya yoimuna osho yo eembuto dokukuna).
Ngurare okwa twikila ta ti oprograma yoshikukuta oya enda momashongo mahapu. Omashongo amwe omwa kwatelwa oikulya inai fika diva koitukulwa oko ya nuninwa.
“Nande ongaho, eumbo keshe ola li hali pewa okakutu keekilograma 20 koufila wepungu ile omahangu kamwe, eendooxa nhee deeshi ile a hoolole okapaki keegrama 750 kosopa, eendoxa mbali domakunde nokapaki keekilograma 1.5 kombelela osho yo ekende lomaadi, ”Omuprima ta holola.
Omuprima okwa ti ouministeli woifitukuti owa li wa yandja eendjaba 86 neendjaba 71 oda dipawa okutopolela oshitukulwa shaKavango West, Kavango East, Zambezi, Ohangwena, Oshana, Oshikoto, Erongo, nOtjozondjupa.
Oinamwenyo imwe ngaashi eengolo, eendjabameva, eengalangobe naikwao oya dipawa okuweda oshivelelwa shoshiwana.
Oinamwenyo eyi oyali ya dipawa moshikunino shoinamwenyo moMangetti, Mahango, Kwando, nomoBuffalo Bwabwata.
Ombelela yayo vati oya tukulilwa oshitukulwa shaKavango West, Kavango East noZambezi.
Ehanghano loMeatco nalo ola yambidida epangelo eshi la yandja ombelela yongobe koitukulwa Kavango West, Kavango East, Zambezi, Khomas, Hardap, no//Kharas.
Ngurare okwa holola yoo kutya epangelo ola longifa eemiliona N$99.7 okuandjakaneka omeva koitukulwa ya yooloka moshilongo.
Epangelo ola fa eemboola 42 moitukulwa shaHardap, Erongo, Kavango West, Khomas, Kunene, Ohangwena, Omaheke, Omusati, Oshikoto noZambezi.
Epangelo ola mona yo omakwafo a yooloka okudja kondje oshoyo meni loshilongo.
“Oshimaliwa shi fike pomiliona 1.2 oshoyo oikulya yongushu i fike poN$793 858.57 oya yandjwa koohandimwe moshilongo omanga epangelo laChina naIndia la yandja oikulya i fike pongushu yoshimaliwa eemiliona N$160. Algeria okwa yandja oN$17 760 000, Malaysia ta yandje N$710 400,” Omuprima ta ti.