Auleria Wakudumo
Ovanhu vamwe vomwaavo va kala hava tambula oikulya yoshikukuta moshilongo otava pula epangelo li talulule etokolo loku xulifa po eyandjo loikulya yoshikukuta shaashi vati vamwe inava likola mo sha momapya molwa omeva.
Oshivike shadja ko Omuprima Elijah Ngurare okwa shivifa kutya eyandjo loikulya yoshikukuta otali ka xula okuyandjwa muAuguste, shaashi neudo okuna eteyo liwa.
Ashike Ndinelao Ndesheeta, umwe womovakwashiwana ovo vali va yelulwa molwa efudja komukunda Onamhindam Ohangwena okwa holola kutya okwa uda nai shaashi okwa li va pulwa va yandje omadina avo op ova kale tava mono omakwafo momukokomoko wodula.
“Ka pena ou eheshi kutya fyee vamwe neudo ina tu likola mo sha momapya molwaashi oikunomwa yetu oya ya koshi yomeva. Ava twa lima diva, oilya oya hangika ya tula ko eemuma ashike oya olela momeva,” Ndesheeta ta ti.
Okwa ti ngeenge epangelo ola kala inali va kwafa, vahapu otava ka kwatwa komanyutu ile vafye omenyo wokoshifima woovene.
Elia Vatileni, umwe womovakwashiwana ava vali va yelulwa keelu lomeva kEhenye mOshakati okwa ti nande va kufwa molukanda, ova pumbwa natango ekwafo.
Vatileni okwa indila epangelo opo li talulule nawa etokolo lalo lokukufa po oshikukuta osho vamwe va pumbwa natango.
“Otu shishi kutya neudo okwali omudo welooloo navahapu ova mona oipalwifa ya wana ashike opena ava twali twa yelulwa komeva notwa pumbwa ekafo,” Vatileni ta ti.
Omupopiliko wombelewa yomuprima Maxmus Halwoodi okwa kwashilipaleka kutya epangelo otali twikile okudidilika nokuyambidida ovo vena omhumbwe moitukulwa aishe 14 yoshilongo.
“Epangelo okupitila mokakomitiye koDisaster Management otali ka twikila okudidilika ovo veli momhumbwe nongeenge opwa kala pena ou a pumbwa ekwafo, nena okabinete otaka ka yandja etokolo laxuuninwa opo ku yandjwe ekwafo olo,” Halwoodi ta ti.
Halwoodi okwa kwashilipaleka kutya eshi tashi kufwa po eifano olo lali la ningwa kOmupresidente mukulu Nangolo Mbumba kombinga yoshikukuta.
Okwa indila ovakwashiwana opo vaha kale vehena oumbada ngeenge tashiya koikulya yoshikukuta shaashi epangelo oleli longekida okukwafela oshiwana efimbo alishe.
“Nande ongaho, ohatu indile oshiwana opo shi kune oukunino vashona konima yomaumbo.
Elalakano loukunino okuxwepopaleka nokukondjifa ondjala moshilongo,” Halwoodi ta ti.
Omupilima okwa yeleka yoo kutya oikulya ya’Shakulya oshaNakulongo otai aluka.
-wakudumoauleria@gmail.com