Auleria Wakudumo
Oproyeka yokuadjaneka olusheno oshoyo oproyeka yopate mOndangwa Extension 28 – olukanda olo la shivika nawa nedina Onguta – oli li poku pwa.
Omupopiliko welelo lodoolopa yaNdangwa Petrina Shitalangaho-Mutikisha okwa holola kutya oproyeka yolusheno otai kosho eemiliona N$12.5. Oproyeka ei oya hovela muJanuary neudo. Eepelesenda 80 doproyeka oda pwa nale okulongwa nokwa fyaala ashike eepelesenda 20 okumanifa oproyeka filu filu,” Shitalangaho-Mutikisha ta ti.
Shitalangaho-Mutikisha okwa ti oproyeka oya teelelwa i kale ya pwa muDecemba neudo.
Oproyeka otai ka andjaneka olusheno momaumbo, okuninga omalolelo olusheno naikwao ya wedwa po.“Okuandjaneka olusheno momaumbo ovakwashiwana otashi kwafele ounona va kale tava lesha vehena ounghundi washa. Olusheno molukanda ohali kwafele yoo okukaleka eembudi kokule, tali kwafele nokuyambula po eengeshefa dishona,” Shitalangaho-Mutikisha ta ti ngaho.
Omupopiliko wodoolopa okwa holola kutya elelo lodoolopa yaNdangwa otali tungu opate tai kosho ongushu yoshimaliwa shi fike peemiliona N$12.8. “Opate oya tameka okutungwa muJuni noya teelelwa i kale ya pwa muOktoba neudo,” Shitalangaho-Mutisha. Elelo lodoolopa yaNdangwa onghene tali twikile okuyambula po nokuxuma komesho omalukanda modoolopa yavo. Shitalangaho-Mutisha okwa ti ovakalimo vomOnguta ova tambula ko exumokomesho nomake aeshe.
“Ovakalimo ova tambula ko exumokomesho unene shaashi ova kala tava tanguna kombinga yopate yokuya kokapangelo pefimbo lodula oyo hai kala ya tyapilwa nohai imbi ovakwashiwana va fika penya naapenya,” Shitalangaho-Mutikisha ta ti. Elelo lodoolopa yaNdangwa ola indila ovakalimo vomOnguta opo va longele kumwe naavo tava longo olusheno nopate molukanda lavo.
Ova ti elongelo kumwe lavo otali kwafele ovalongi volusheno nopate okulonga noupu nokukwashilipaleka kutya oilonga oya pwa pefimbo ngaashi sha tengenekwa. Eeproyeka adishe da tulwa kumwe otadi kosho ongushu yoshimaliwa shi fike peemiliona N$25.
Eeproyeka oda nhuninwa okuyambula po onghalo yovakwashiwana vomOnguta oshoyo exumokomesho lomalukanda mOndangwa.