Auleria Wakudumo 

Ongwediva – Minista wounamapya nounaimuna, eeshi, omeva nomatalululo omadu Inge Zaamwani okwa yandja pambelewa omaloli eetona 30, outemba vokuhumbata oimuna naavo voku endela oimuna ngeenge tai i meloli, kuMeatco, Etitano, mOngwediva. 

Omaloli noikwafifo ikwao oya nhuninwa ovanafaalama vomonooli, hano oNorthern Communal Areas (NCAs),okushunifa ondado yokututa oimuna pedu.  Omaloli okwa kosha oshimaliwa sheemiliona N$20. 68. 

Okwa yandjwa okupitila moproyeka hai ifanwa, oLivestock Support Programme (LSP), ya pewa oshimaliwa koEuropean Development Fund. 

Okuyandja omaloli aa okwa kwatela mo okuxwepopaleka elongifo loshimaliwa shihapu, osho hashi longifwa kovanafaalama ngeenge tava tutu oimuna yavo, oshoyo okuninga omangeshefelo keenhele di lili nodi lili. 

Efimbo ta yandje omaloli aa pambelewa, minista okwa holola kutya omaloli otaa ka lundulula onghalo yovanafaalama vahapu monooli, shaashi vahapu ova kala nokukema kombinga yoyeendifo oule wefimbo. 

“Omaloli otaa ka kwafela ovanafaalama okututa oimuna koutomeno, konhele yokukondekela oimuna manga inai landifwa, osho tashi ka yandja omhito kuvo opo va kufe ombinga moipindi yopombada oyo ya pitikwa,” minista ta kwashilipaleke ngaho. 

Zaamwani okwa ti epangelo ola katuka yoo onghatu ei opo li yambule po ovanafaalama. 

“Omaloli otaa ka kala mewiliko laMeatco notaa ka kwafela okututa oimuna yovanafaalama aveshe okuya koutomeno, ngaashi oko-Katima Mulilo, Eenhana, Oshakati, Outapi no-Rundu,” Zaamwani ta weda po.

Zaamwani okwa holola kutya oprograma yokukwafela oimuna oya nhuninwa okukandula po omaupyakadi a kundukida ounamapya nounaimuna, ngaashi okulumbula oimuna okulya, ouhaku woimuna nomumbwe yomalandifilo oimuna.

Nande ongaho, minista okwa holola kutya oilongifo ya yandjwa hayo ashike ekandulepo lomukundu. 

Okwa indila ovanafaalama va longife omikalo dopashinanena da yooloka okulongifa ounamapya nounaimuna monakuiwa.

Zaamwani okwa holola yo kutya epangelo oli li mokati keeproyeka dimwe da yooloka koshi yelelo loNational Planning Commission. 

“Eeproyeka edi omwa kwatelwa okuyambula po okatomeno mOpuwo, okutunga omanga yoimuna mOkapya, okutunga ombelewa yexumokomesho lounamapya nounaimuna, oshoyo ombelewa youhaku woimuna moNkurenkuru, onhele yokukaleka oimuna moNcaute nomoKatima Mulilo, okuwedela kofaalama mOmutambo Maowe nokutunga oshiunda shoimuna ifike pe-1 000 mEtunda,” Zaamwani ta ti. 

Okwa ti eeproyeka edi odi li oshitwa shopokati mokuyambula po onghalo yovanafaalama, unene koushai nokuyambula po onghalo yoikulya moshilongo. 

Omukulunhuwiliki woMeatco, Kingsley Kwenani okwa holola olupandu kuminista, oshoyo koEuropean Union eshi tava twikile okulongela kumwe okukwashilipaleka kutya ova wanifa po omakemo ovanafaalama vokoitukulwa ya yooloka. 

“Omaloli aa twa pewa nena otaa ulike kutya opena elongelo kumwe la kola pokati kepangelo letu noilongo ikwao. Ekwafo eli otali holola yoo kutya ovaleli vetu ovena novanafaalama aveshe moshilongo,” Kwenani ta ti.  

Kwenani okwa ti nande va mona ekwafo eli, ovanafaalama ova taalela natango omashongo amwe ngaashi okulandifa oimuna yavo keenhele edi da kula. 

-wakudumoauleria@gmail.com