ONGWEDIVA – Ethigathano lyokakadhona dhingi lya ningwa Olyomakaya mOngwediva mehala lyomauliko giipindi, moshitopolwa shaShana olya gongaleke ehwata lyaantu mwa kwatelwa aanenentu.
Epapa lyokakadhona dhingi olya sindanwa kuJohanna Swartbooi gwomimvo 24, ngoka a mana eyilongo lye onga hahende koshiputundhilo shopombanda shaUnam.
Oshiindingili shoka oshali aanenentu ngaashi omupevi presidente Lucia Witbooi, minista gwomauyelele Emma Theofelus, omukuluntu gwoNBC Stanley Similo, oshowo aanangeshefa yalwe.
Shika okwali oshikando shotango oshiindingili shili ngiika tashi holoka konooli no shali hili lela oshigwana oshindji.
Similo okwali a holola enyanyu nohokwe omolwa oshiindingili sha ende nawa ngaashi naana kwali ya tengeneke.
“Elalakano lyetu oku fala oshiindingili shokakadhona dhingi kiitopolwa ayihe moshilongo,” ta popi ngaaka.
Ta ti, shoka sha holoka Olyomakaya osha holola uukumwe, uunyakwa oshowo ohole yokakadhona Okanamibia.
Similo okwa okwa pandula wo omahangano oshowo aanangeshefa na kehe ngoka ali ayambindhindha ethigathano lyokakadhona dhingi.
Ondjila yokakadhona dhingi
Shika ka kwali oshikando sho tango Johanna Swartbooi ta kutha ombinga momathigathano gwokakadhona dhingi, sho ali a kutha ombinga momumvo 2022, ihe ka kwali eshi enditha nawa.
Shoka ka kwali she mu shololitha, moshiwambo ohaku ti, dhengwa wu lungame.
Swartbooi ovalele ya Keetmanshoop, a tekulwa ku yina oyiike.
Okwa popi kutya okuna ohokwe yoku lundulula onkalo yoshigwana, eyilongo oshowo uuthemba womuntu.
Swartbooi okwa gwedha ko wo kutya okuna oproyeka tayi ithanwa “Power to You Foundation” ndyoka yina sha naagundjuka yeli kuushayi, okulundulula oonkalamwenyo dhawo oshowo okuya kumagindha ya landule ondjila yomondjila nokwiisimaneka.
Sha ikolela kwa mboka yali taye ya talele methigathano, oya popi kutya eyifupipiko lya Swartbooi, ewi lye oshowo omayamukulo oya dhenge mo ayehe ali nayo methigathano.
Shoka a sindana
Okakadhona dhingi Okanamibia 2025, Swartbooi okwa sindana omagano gohauto,egumbo, oshimaliwa, ompito yoku ka kalelapo Namibia komathigathano gokakadhona dhingi muuyuni oshowo iikwawo yilwe.
Aakuthimbinga
Ethigathano lyokakadhona dhingi Okanamibia okwali lya kuthwa ombinga ku Johanna Swartbooi, Uatjiri Mbaisa, Tuilika Andreas, Melissa |Uises, Ndehipewa Angula, Hertha Iipinge, Yvonne Kambonde, Selma Hanghuwo, Laila Kandjii, and Gloria Ndapewa.
Ihe mboka yeshi pondola kompito ya hugunina oyo okakadhona dhingi Swartbooi nomutango Uatjiri Mbaisa, omutiyali Tuilika Andreas na yaali ya hugunina Melissa |Uises and Ndeshipewa Angula.
Aakadhona ayehe oyali yuulike uunongo wawo momikalo dha yooloka nonando mwa hogololwa mboka yeshi enditha nawa unene.
Etumwalaka lyokakadhona dhingi
“Shika kashi shi ashike oshishani shandje, ihe otashi ulike ewi lyokakadhona okagundjuka kehe moNamibia ka taalela onkalo odhigu ihe ka kena omakwatho ga sha,” ta ti ngaaka.
Ta ti okwa thikama mpoka sho a kala noku holoka ethimbo alihe ihe ina sholola.
Okwa ti okwa ilongekidha okulonga nelalakano lyoku lundulula oonkalamwenyo dhaamboka ya taalela uudhigu.
Swartbooi ta ti ota kalelepo Namibia onga okakadhona dhingi nondjungu.
Euvaneko
Sho aakadhona mboka omulongo yali ya kutha ombinga methigathano lyokakandhona dhingi Okanamibia oyali ya talele po ombala yomukwaniilwa gwOndonga oomwedhi dha ziko noyali ya uuvanekelwa ongombe yomusindani dhingi.
Aakadhona mboka esiku ndyoka oya li ya kundu omukwaniilwa Fillemon Shuumbwa Nangolo taya kookaya ongesimaneko lyomukwaanilwa osho wo omuthigululwakalo.
“Ngoka ta ka sindana esiku ndyoka otatu ke mu pe omagano gongombe okuza melelo lyomuthigululwakalo gOndonga ongolupandu,” Omukwaniilwa uvaneke ngaaka.
Okwa gwedha ko wo kutya otaya yambidhidha noshimaiwa N$30 000 okulongekidha oshiindingilo shoka oshinene.
Omunenyekadhi esiku ndyoka okwa li ulikile aakodhona mboka mOmbala osho wo iinyangandhalwa ya yooloka.
“Moshiwambo ohatu tsu, ohatu longo mepya osho wo okuteleka niikwawo oyindji. Ongomukulukadhi gwegumbo, ayihe mbyoka owu na okukala we yi kwatela komeho,’’ ta ti ngaaka.
Omunyekandhi okwa fatulula esimano lyomuthigululwakalo wo.
Omukuluntu nomukwatelikomeho gwokakadhona dhingi Okanamibia Umbi Karuaihe-Upi okwa pandula omunyekadhi sho e ya taamba ko noku ya fatululila esimano lyomuthigululwakalo.
Ta ti, okukala kuume nomukwateli komeho gwokakadhona dhingi Okanamibia nuumvo okwa gwedha ko ongushu koshiindingili shawo.