OMUNDAUNGILO- Luusina Haihambo weedula 82 a dja momuhoko wOvayelele oo hadi mepundo laye li li komukunda Omhalapapa moshitukulwa shaHangwena, okwa ti ova panda nove udite etumba okudja momapundo avo shaashi omuna eemhepo dovakwamungu tadi va a mena.
Pefimbo Kundana a talela po omapundo mexuliloshivike koshikandjohoololo shaMundaungilo, oshiwana shOvayele osha hokolola tashi ti nonande va tungilwe omaumbo oshinanena itava fiye po omapundo avo. Mekulu Haihambo okwa hokolola ta ti owa lombwelwa kovakwamunngu kutya ina fiya po omapundo molwashi osha fimana pamufyuululwakalo vavo.
“Momapundo omuna omundilo wetu wokutukwatela komesho. Ihatu mono eemhepo dovalodi shaashi otwa a mwena kovakwamungu,” ta ti.
Okwa ti pamupundo opo okwa kala po okudja omudo 1984 ashike ina didilika po oupyakadi wa sha.
Haihambo okwa ti mepundo limwe oha mu di ovanhu 15 mwa kwatelwa ounona.
Mekulu Helaria Haule weedula 92 oku li omukulunhu womapundo okwa hokolola ta ti ngeenge momapundo ova dimo otava handukilwa kovakwamungu.
Okwa ti otava twikile okukalekapo omufyuululwakalo wavo ngaashi naana omihoko da yooloka moshilongo da fimaneka omifyuululwakalo davo.
Okwa ti ova pandula epangelo molwashi ohava mono pewa oshimaliwa shopendjela noshoyo oikulya yoshikukuta.
“Ngeno ka pali epangelo ngeno iha tu mono oshimaliwa shopendjela. Paife ohandi dulu okulanda oikulya yovaneumbo vange,” ta ti.
Haule natango okwa pandula epangelo eshi la yandjaneka omeva momukunda vavo molwashi paife ohanu omeva ayela.
“Otwa taalela ashike omashongo omakumbafa unene tuu pefimbo loutalala,” ta ti.