OSHAKATI- Okomisi yoSocial Security oya yambindhindha oosikola noshigwana niikwathithilongo oshowo oshimaliwa shongushu N$250 000.

Okomisi oya yandja omagano ngoka koosikola dhayooloka kaakalimo yokonooli mehuulilo shiwike kOshakati.

Omupopiliko gwOkomisi Anthea Olivier, okwa fatulula kutya oya gandja ngaaka nelalakano noku tsakaneka epangelo ondjilakati, sho ya totha mo omaupyakandhi ga taalela oosikola dhimwe.

Ta ti, oproyeka ndyoka oye ya po nayo nelalakano lyoku yambindhindha, elongo oshowo omaudhano kiitopolwa yokonooli.

Mwaamboka ya mono omakwatho, oombelewa onene dhopashitopolwa dhokOshikoto, dhoka dha  yambindhindhwa nomashina gatatu gokuninga ookopi nookompiyuta dhopeke dhili ndatu? yongushu N$20 541.

“Onda inekela kutya omayambindhindho ngoka otaga ka kwathela shi nene oshikandjo shOmuthiya, opo iilonga yi kale iihwepo,” ta ti ngaaka.

Ta ti natango osikola oya gandja oshimaliwa N$34 160 kosikola St. Gabriel Primary yili kOkalongo opo yi mane okutunga olugumbo lwawo lwosikola.

Oliver okwa ti shoka otashi ka gamena aanasikola ya pita 300 okukala mehala lya gamenwa omanga  yeli mosikola.

“Osikola Oshikunde Combined nayo oya yambindhindhwa nookompiyuta dho peke dhili 10 dhongushu N$44,990. Dhoka otwe dhi gandja okukwathela aalongwa ya tseye uutekenika wopaungomba oshowo oku xwaxwameka eyilongo lyawo,” ta fatulula ngaaka.

Oproyeka yokumatuka tayi ithanwa “The Run Along Sport Foundation” oya kwathelwa noshimaliwa N$50 000 okuyambindhindha omathigathano gokumatuka.

Ta ti oshimaliwa shi thike N$100 000 osha gandjwa kOmukoko Co-operative Ltd, ehangano lyomukiintu lya totwa okuyambindhindha oshigwana sha taalela omaupyakandhi ga yooloka.

“Okomisi oya kala noku yambindhindha oshigwana okuza omimvo dha ziko no tayi tsikile okushininga. Oya gandja omakwatho ngoka sho kwali kwa nigwa omapekaapeko tango naashoka taya pumbwa unene,” ta fatulula ngaaka.

Oosikola nomahangano agehe ga mono omayambindhindho esiku ndyoka oga gandja olupandu olunene kwaashoka ya yambindhidhwa na sho.

vkaapanda@nepc.com.na