Auleria Wakudumo 

Ouministeli wehongo, oungoba nomaudano mekwatafano nouministeli woukashike kookanhu nonghalonawa yokaana owa pewa oushako voufila wetete veli 2 500 kehangano loEuropean Union. 

Oushako vetete ova nhuninwa okuyambidida ounona mehongo lopedu olo hali ifanwa o’Early Childhood Development’ moshitukulwa shaErongo. 

Ehangano loEuropean Union ola yandja oushako vongushu yoshimaliwa shi fike peemeliona N$29. 

Pefimbo ta tambula ko oushako voshikukuta, Minista wehongo Sanet Steenkamp okwa holola kutya epangelo otali twikile okulongela kumwe noikondo, omahangano oshoyo oilongo ya yooloka okuxwepopaleka omanyutu oshoyo okuyambuala po exumokomesho lounona. 

“Okaana oka pumbwa ka kale ka lya oikulya wana opo ka dule okupondola sha mofikola. Kapena kaana ka pumbwa okukala inaka mona ehongo molwa ondjala ile oikulya inai wana nawa,” Steenkamp ta ti.

Minista okwa ti ouministeli otau twikile okupula omakwafo a yooloka kwaavo tava dulu okuyandja ekwafo, tave shi ningi momukalo womondjila nowopauyuki opo u kaleke po nokuyambula po oprogramma yo Early Childhood Development. 

oEuropean Union oya longela kumwe noprograma yoUnited Nations World Food hano oWFP Namibia, oshoyo oUnicef Namibia. 

-wakudumoauleria@gmail.com