Taimi Haihambo 

Ovanadolongo vamwe vomodolongo yOluno mOndagwa ove lipyakidila nokutalelapo eesekundofikola moshitukulwa shaShikoto okuyandja ehongo kovanafikola li na sha noshiponga nomalihumbato a puka osho yo elongifo loingangamifi. 

Exungomwenyo eli nekumaido otali yandjwa kovanadolongo ovo va pewa nale ehandukilo molwoimbuluma ya yooloka. Ovanadolongo ova hoololwa onomenawina opo va ka popye novanyanyamaulu ovo va ninga oihakanawa yoimbuluma monooli. 

Etalelepo ola tameka Omaandaxa nola tengenekwa li xule nena. Eefikola mOshikoto edi da talelwa po ongaashi, Ontananga SSS, Uukule SSS, Nehale SSS osho yo Hans Daniel Namuhuya SSS. 

Etalelepo oli kwetelwe komesho komupopiliko wodolongo yaLuno Veikko Jeremia. Jeremia okwa ti ei omhito iwa kovanadolongo opo va dule okuyandja ouyelele weendjila edi va enda opo ve lihange va kufwa emangluko lavo va tulwa konima yokakuma. 

“Ovanadolongo ngeenge twe va pa omhito i li ngha ohava ka popya lela va manguluka, nokulombwela ovanyanyamaulu kutya odolongo okapale ashike okandjena,” Jeremia ta ti. 

Pefimbo letalelepo umwe womovanadolongo okwa yandja ondjokonona yaye nghee a li oshihakanwa shomapangwe, nonghee omapangwe a tetela ongahalamwenyo yaye ondjilakati eshi kwa li te lihongele oAccounting koshiputudilo shopombada. 

“Okwa li ndi na elao shaashi onde ke lihongela kondje yoshilongo oko nda ka wila mohole nomapangwe ponhele yofikola ei ya li ya endifa nge. Onda ka papala ashike eshi nda tameka ongeshefa ihe li paveta oyo ya etala nge ndi tumwe keumbo okudilila moEmbasy yaUnited Kingdom. Onde ke lihaluka ashike eshi ndi na oudu wopomadilladilo oo wa etifa ndi nyone oinima yovanhu, fiyo handi tulwa moipandeko,” umwe womovanadolongo ta ti. 

Ovanambelewa vokodolongo yaLuno navo ova yandja omakumaido kovanafikola, no ku va pa ouyelele kombinga yomaifano haa dulu okulihongelwa momandiki ezulonghalo. 

Ovakulunhufikola ova yandja olupandu la kula koNamibian Correctional Service eshi tai handjakaneke oukwashili oo ihau longwa meefikola. 

-taimihaihambo2000@gmail.com