“Kororowa, ovanazondunge aave varwa otjovaṱakamise vouatjiri nonḓengu yongaro. Otjiungura tjavo otjinene yari okuhiva nokurihumba kozonḓero zoporotika nehupo rezumo rawo oveni, okutumbura otjiwaṋa nouatjiri noukohoke. Ovanazondunge okuvehandjaura, vari imba mbaave panḓere pourekoto wongaro yominyo vyawo, otjitenga kuwo yari okukongorera ondjiviro nomerizuvisiro wongaro ombwa pendje nokukarera poo okurambera vyouye.”
Omutjange umwe ngwa resa embo ra Julien Bendana rena, “Oruhororo rOvanazondunge”, mokutarurura embo ndi ma tja nao. Embo ra Bendana indi ohunga nokutja ovanazondunge ndino ndi va rira ovatatumise novisepa mbinḓu pu novakwao ovanane motjiwaṋa pendje nozondunge zawo ku ve tjiukirwa okutjurura otjiwaṋa kozongaro ozohazerwa, tjinene zehupo evi na vyarwe tjimuna ondatumisire momuano umwe poo warwe.
Umwe wOvanazondunge zoruveze rwanambano mOnamibia nOtjiwaṋa tjOvaherero ngu tjari na ye, kamundu warwe pendje na Rikondja Ben Karamata, ngwa tjirirwe ama womboroka monamiti yohoromende ya Katutura Oroviungura nda zuko omayuva tji ya ri 19 komueze mbwi, Suramazeva. Posi ya eye ka womba, Bendana mbu ma hee kutja va rira ookaukirira okurya nokupatera ouatjiri pendje mena rokukongorera nokurambera ovikurya. Omurumendu Omukwahere ngwi, omundu ko nootja wa hongwa mena rokutja, mbu hongwa outi. Nandarire ounatje wina kau hongwa u rihonga ouini amau tarere otja tji mau kuru nganda au utu okupambaha ondjira ouini kehi yondaveho nomatumburiro wovanene vawo.
RBK poo tje rivanga omuini ngu me ritjiukisa otja Brian Jones, omundu mo ṱokutja ke ya hongerwe nungwari omambo we yerire ku katjotjiri. We yeresa ne ye zuu. E he ye zuu kokutja we yezuva porwe nungwari wina eye tjiwa kutja ma ungura nawo tjike ku ku he ri kondungiro yehi re porwe nungwari wina otjiwaṋa nomihoko vya Namibia. Tjinga otjomundu ae ha ri Omuherero porwe nungwari Omuherero Omunamibia poo Omunamibia Omuherero.
Mu nao, mu vyarwe, ovingi ma rire orupa okuura mousemba we otjondekurona okuura yaimba mba huka ominyo mOtjiṱiro Otjindjandja. E he rikutu komunda umwe poo warwe posi ya e tji ungurire pu me tji ungurire ama ungurisa ounongo nondjiviro ye otjomundu ngwe riresera nungwari ngu ha hongerwe otjovandu vanambano mbu ma ku zu ve hongwa poo va hongwa nu ngunda ape ri nao imbi mbi va hongwa ave he vi zuu. Kape norupa rumwe rwaimba me tja ve kondjisa otjisuta kaari popezu naro okuyenena kokutja ku ze wari owombara karive poo karive. Pozondongamo pekepeke ourizemburuka we, we ze pa. Tjiva ave puratene uriri ave yara poo kutja va kaṱizira pi? Korusenina aa tja: ‘Otjiwaṋa ngatji pambahe Otjombanguriro Tjouye’. Ovandu va haama mOmurari imbwi John Tjomainja.