Omupopiliko welelo lodoolopa yEenhana Martin Simeon okwa ti ovanangeshefa 208 mwa kwatelwa omahangano a yooloka otava kufa ombinga komaulikilo oipindi aEenhana oo tameka Etitano. 

Omaulikilo oipindi otaa ka xula momafiku 2 Aguste. 

Okwa yelifa ta ti fiyo opapa inava didilika oupyakadi okudja efiku lotete oipindi ya tameka. 

Omupresidente Netumbo Nandi-Ndaitwah okwa teelelwa nena okukala a patulula oipindi pambelewa. 

Okwa ti neudo omwaalu wovanangeshefa tava kufa ombinga komaulikilo oipindi owa wedelwa mokufafanifa nomudo wa dja ko. 

Okwa ti okutameka eevili dongula pefimbo loshivilo shepatululo pambelewa oshiwana itashi futu okuya mendiki loipindi. 

“Oshiwana nashi holoke momwaalu muhapu okuya kepatululo pambelewa lomaulikilo oipindi,” ta ti. 

Simeon okwa ti paife ngaha oshi li oshikando oshi-15 odoolopa yEenhana tai ningi omaulikilo oipindi. 

Okwa ti omaulikilo oipindi okwa fimana molwaashi otaa etele odoolopa yavo oyuuyemo yokuyambula po odoolopa. 

“Ovanyasha osho yo ovangeshefa vashona ova mona omhito yukulandifa oilandifomwa yavo,” ta ti. 

Simeon okwa ti eameno oko li la wana molwaashi ovanambelewa vopolifi otava longele mendiki loipindi okukaleka po eameno nelandulafano. 

“Oshiwana inashi pumbwa okuumbata oilwifo ngeenge tashi ya komaulikilo oipindi,” ta ti. 

Okwa pula oshiwana opo shi talele po outala vomahangano a yooloka shaashi otaa yandje omayakulo opashiwana. 

-fhamalwa@nepc.com.na