Auleria Wakudumo 

Opolifi moshitukulwa shaMusati oya pondola okutula omukadona weedula 19, omukwashiwana waAngola moipandeko eshi vati a ekela ohanana yomafiku atatu mokandjuwo. 

Oshiningwanima eshi osha ningilwa momukunda Onandjaba mOkalongo, Etinhe. Omukulunhu wopolifi moshitukulwa shaMusati, Commissioner Ismael Basson okwa koleka oshiningwanima eshi. 

Ina yokaana vati okwa yambukile komukunda Onandala moCunene moAngola. Otaku hokololwa ovanhu va uda okaana taka kwena momututu wokandjuwo lwopo 17h08 komatango. 

“Ovakwashiwana ova ninga onghendabala yokufa elambo okudja konima yokandjuwo ndele tava kufa mo okaana mokandjuwo,” opolifi tai holola. 

Otaku hokololwa ohanana ya twalwa koshipangelo kOkalongo oko taka mono ouhaku wa wedwa po. 

Okaana otaku hokololwa ke li monghalo i li nawa paife. 

-wakudumoauleria@gmail.com