!GOMENǁGAMS – !Hūb di ǁûs, Netumbo Nandi-Ndaitwahs ge ǁîs di ǂâiǂhansensa ai!gû ra ǁama!khunis ǀkha hâ ǀhôakao!narib hîa ǂhanub xa a ǀhonkhoe-aihe ǂnûiǂgādi (SOEs) !nâ hâb !oagu ge gowaǂuisen tsî !ereamxasib tsî !gôasib ǀkha hâ ǂgaeǂguisa ra ǂgao. !Hūb ǁûs di haisi-ams hîa ge Sîsengu tsî !Nari!oabadi Ministeri, Veikko Nekundib xa !Gomengams !nâ ge ǂoa ge wekheb di Donertaxtsēs ai hâ i SOEdi kurikorobe ra hâ hoa!nâ-aixa ǂnûs !nâ ǁhao-aona gere māhes !nâs ge ǁîsa ǀkhamasa !khâikhomsa !gâi tama tanisens !oa-ai ge mā. “ǁAma!khunis ǀkha hâ ǀhôakao!narib ge tātsē ǂâioǂamse ra hā xū tama-e. Sats xa ra ǀaweǁguihe tsîts ǂōrisasib ǀkha ra dīǂui. Nē ǂhanuo!nâ ǀgaub ge nî ǀamǀamhe,” tis ge Nandi-Ndaitwahsa ge mî. ǁÎs ge ǁama!khunis ǀkha hâ ǀhôakao!narib SOEdi !nâ hâba !numis ase gere ǁgui!ā tsî nēs nî ǀamǀamhe ǁawosa dā!harodi ǀkha !khaisa gere ǀgonǀgon!gao. 

!Hūb ǁûs di haisi-ams ge nē ǁaeb hîab ai!âkam Dana Sîsenǂuira Mâisab (CEO) Namcors dib tsî ǁîb ǀkha gere sîsenǁaren tsîna ǁnâu!gâ!khaib !nâ ǂnûǁkhaemaris ai ǁnāxūhesa ra !kham ǁaeb ai, ǁîn ge ǀgūǁae !khōsis !nâ ǂgui-mijundi !nâ hâ oli-i ǂharugudi ǀkha !gaeǁaresa ūhâse a ūhes khao!gâ ge hā. Nandi-Ndaitwahs di haisi-ams hîa ge saliǀoa ge i 63 xa ge !nāsa i Dana Sîsenǂuira Mâisan, ǀawemā!nandi ǁanin tsî ǂhanuǁgui-aon xa gere ǁnâuhes !nâs ge ǁîsa, ǁîs ūhâ ǀarasasib hîas !nākorobe !nurigu !nâ nî mû mâtikō ǀhôakao!narib ǀnî SOEdi !nâ hâb ǂnamipesa gere ǀau. ǁÎs ge !khâikhom tsî ge mî, nē dīǀgaugu ra ǂgom!gâb ǀhûhâsigu !nâ hâba ǂoa!nâ kai tsî ǀgaisase !hūsi omkhâisens !aroma a māsa huisenxūna ǀkhara ǀkhāb ǁga ǂgaesa. 

“Nē ǁkhaisaǁî !hūb ǂgaeǂuis ge !aruǀî ǀhôakao!nariba taniǀnam tide. Tari-i ǀgui-i ka xawe-i nē !gâi tama !narib !nâ nî !âs kara, o-i ge ǂhanu-aisiba nî !oa,” tis ge ge mî. ǁKhātis ge ǂgansa ge dī, SOEdi nî NDP6 tsî Mûǂuib 2030 dib ūhâ ǁguiǂuisa !gao!gaogu ai omsa tsî nēs !nâ-ū hoana ra !khōǂgā sâuǁkhāsib ǀomkhâis, !gōsase ǂkhamkhoesiba ǁāǁās disa ôa-amsa. 

ǁKhā ǂnûs tawas ge Erongob ǀKharisi Mûǂamaos, Natalia ǀGôagosesa, !Hūb ǁûs di haisi-ams ǀkha ǀhûǀgui tsî ge mî, nē ǁkhoregu a dīǀoaǀoahe ǁkhā !khaisa. “A da !hoas ǀguisa hîsa xu dī-aosis ǁga dawasen. 

ǁKhāsiba da ge ūhâ. ǀGâsas tsîna da hî tama hâ. Sada ge !aromadi !aroma a māsa marina da nî hîǀhurus !ereamsa māhe tama hâ. 

Gamse !uidi kōse gaxuse ra ūhâhe ǂnûdi ge nî ǀamǀamhe, ǁnāpas mâtits N$20 miljunsa xu sa !â-e a hō ǁkhāsa ra ǀaweǁguihe amaga. ǂHanu tama ǂharugub sa ǁhōs !aromab ge nî toa,” tis ge ge mî. SOEdi ǀHûs di aiǂnû-aob, Fluksman Samuelsi tsîn ge ǁhao-aona ge mîba, nē ǂnûs ǁnaetisa ǂnûdi di ǀgui tama hâsa, xawe ǂande ǀgoragus tsî hâ a ǁgoaǂuide ǀhûǁarebese oresa hōbas ai hâsa.