Ovaṱuta mave tokwa okutumbarisa ovinamuinyo tjinene vyokuvirandisa pendje nehi tjimuna kOtjina.

Oministera yOtutumbo nOvikunwa, Omeva, Omahundju, nOmatungururiro wEhi, Inge Zaamuaṋi, wa tjitire omatokero inga kovaṱuta pomahavarisiro wozongombo nozonḓu kovaṱuta mErongo. 

Ama pambara kutja ngunda Onamibia ra uta okumuna omarandisiro kovitamba vyonḓengu okutuurungira mOmaitaverasaneno nOtjina konyama yongombo nonḓu, ovatumbavinamuinyo mave sokurondera kuwo okuhina okupokera kutja otjitamba atji ha hepa ozonyanda pu mape zu onyama. “Ouzeu u rira kutja kape notjitamba tjomarandisiro. Nambano u notjitamba. “Arikana nambano yerururee nu karee noviungurwa vyonḓengu mbi mavi yenene okuranda kouye wopendje. 

Ovarandise pendje nehi ve vanga ondjinda yondjiririsa otjiveke atjihe. Katu sere okuhinda otjikondeina tjimwe uriri nai, na tjarwe mu Ndengaṋi, na tjarwe mu Tjitarazu. Iho matji nyandere motjitamba,” Zaamuaṋi ma raisa nao. Mu Kambundu, Oministeri otji ya twa omunwe kembo kOmaitaverasaneno nOtjina ngu maye yandjere ovaungure vonyama va Namibia okurandisa kotjitamba tji tji novarye vonyama mberi kombanda yetau rimwe. 

Otja ku Zaamuaṋi oruhindo rovanazongetjesa va Tjina rwe yere okuryangera Onamibia okukonḓonona outomeno nondando yokuisamo onyama onyingi yongombo nonḓu. 

“Otjitamba tja Tjina okasavero okanene tjinene, posi ya matu sokutja pe kare onyama aruhe ndji hi nokupokera. Atu rire ehi ndi mari yandja rumwe tjazumba ovirandisiwa avi zengi movipwikiro vyomarandisiro.” Nampa