Taimi Haihambo
ONGWEDIVA – Omauliko opaipindi oo a kala a teelelwa oulefimbo paife okwa twima ko. Omaulikilo aa taa ifanwa Ongwediva Annual Trade Fair (OATF) okwa teelelika aka kale ko mo22 fiyo omo30 August 2025. Mayola wodoolopa Taara Shalyefu okwa ti neudo vati ouwa womauliko opaipindi otau kadula wodula yadjako. “Neudo otwa teelela oiningwanima ina tuimona nale ngaashi ovaenda tava kadja kondje yoshilongo ta vekeya okukufa ombinga momangeshefelo opedu, nota ve ya oku ulika eedjo davo, oku dilila kondje oshoyo oinima ihapu ya yooloka,” mayola ta ti. Va ti omauliko opaipindi ota meya oku patululwa paveta komulunhu woshilongo Dr Netumbo Nandi-Ndaitwa oo ateelelwa va ti euye pamwe noilyo ihapu yopamutumba wopashiwana. Efiku Nandi-Ndaitwa taka nangeka omauliko opaipindi paveta, vati pomuvelo otapu kapitwa ashike oshamuhongi.
Shalyefu okwa ti ngeenge tashiya kombinga yomalihafifo, oo keshe omunyasha konyala iha endelwako, va ti ova teelela ovashiki ngalo vape no vayooloka ovo inava kufa ombinga nale momalihafifo omo Trade Fair. Okwa ti neudo va ti ota ku kakala yoo kuna oudano weengonyo, oo inau popiwa kutya otau ka kala lela pokati kalye na lye natango.
Kombinga yeamano lovakwashiwana omalongekido nao okwa pwa nale vati. Opolifi moshitukulwa opamwe no Woman and Men Network navo ota ve ke li pyakidila no ku liwifa oimbuluma oshoyo eembudi daNgwediva pamwe noo mbushe moilonga yavo yoikulumuna ovo hava kala vadja keenhele dayooloka pefimbo lo Trade Fair. Okwa ti eefikola ota di indilwa di kale daeta ounona vofikola komauliko opaipindi, opo vaka mone ouyelele unasha nomalihongo koipitudilo yopombada oyo tai ka kala yaholoka. Shalyefu okwa yelifa yoo kutya natango ota ku ka kala kuna omaudeulo oshali moinina yayooloka ngaashi ounafaalama, ounangeshefa oshoyo oku ninga eefewa. Omauministeli ayooloka nomahangano dihapu natango nado ota di kakala di li moTrade fair vati, tadi eta omakwafo kovanhu, ngaashi oumutwe, eedjapo domadalo, eepassport naikwao yayooloka. Ovakufi mninga moualiko opaindi ove li o400, omo nokuli vati vahapu vashunifwakwo shaashi onhele oishona.
-taimihaihambo2000@gmail.com