Auleria Wakudumo
Elipumomumwe lovakwashiwana nepangelo moAngola ola shunifa monima eengeshefa dOvamibia dihapu dashiivika nawa ‘order with me’.
Ekuyunguto eli otaku hokololwa la etwa kelondo londado yomahooli moshilongo osho, osho sha eta yoo nondado yoyeendifo i ye pombada lutatu.
Eshi osha etela Ovanamibia vahapu ovo hava yi koAngola oshoyo ovo hava tumu vakwao va kanife omukumo kutya itava mono vali oilandifomwa yavo oyo va hangwa va mbestela.
Umwe womwaavo veli natano koAngola, Johana Moshana mwene wongeshefa MJ Wonders Boutique okwa shiivifila Kundana kutya natango omakuyunguto inaa xula moAngola.
“Otwa hala okuya komaumbo ashike otwa tila kutya pamwe hatu monifwa nande oshiponga eshi tuli mondjila yokuya shaashi ovanhu otava denge oihauto kopate,” Moshana ta holola ngaho.
Moshana okwa ti omalipumo mumwe pokati kovakwashiwana nopolifi okwa eta va kale ngabekwa okuenda nokwa shunifa eengeshefa davo pedu.
Moshana okwa holola kutya okwa pondola ashike okulanda eepelesenda 50 doilandifomwa yaye. Okwa ti okwa hala omalipumo mumwe a xule opo a dule okulanda oilandifomwa yaye oyo ya xupa ko opo a dule okuuya keumbo.
Nonande va indikwa okuenda, Moshana okwa lombwela Kundana kutya mokati kaavo eli navo, kapena a mona oshiponga ile a tulwa moipandeko.
“Ohatu pandula Kalunga kapena ou a mona oshiponga ile a tulwa moipandeko fiyo opapa,” Moshana ta ti. Omanga ava veli koAngola va tila okualukila keumbo, ava veli meumbo ova tila kutya oilandifomwa yavo ei vali va tuma ava veli koAngola ita vei pashukile vali omesho.
Vute Shikongo, omunangesshefa weedula 33 okwa holola kutya omalipumo mumwe otaa shunifa monima eengeshefa dovalandi voikutu ya djalwa nale ya shiivika nedina ‘omabale’ oshoyo vamwe ovo hava landifa oikutu yomadina okudja koAngola.
“Ohandi landifa oikutu yomadina okudja koAngola shaashi oina ombilixa yoo ombumbo yopomuvelo okuuya moNamibia nayo ohai li didimikilwa,” Shikongo ta holola.
Shikongo okwa weda po kutya ava hava landifa koAngola inava hala vali okulandifa shaashi ovaChina ova tembuka mo neefitola davo dimwe oda hanaunwa po kovakwashiwana.
Shikongo okwa ti nonande ohava lande yoo koSouth Africa, oilandifomwa inai faafana mongushu oshoyo ombumbo yokweeta oilandifomwa moshilongo oili pombada shi dulife moAngola.
“Otwa hala ashike omalipumo mumwe a shune pedu opo Ovachina va alukile moAngola nongeshefa i kale ngaashi yali nale,” Shikongo ta ti. Oikundaneki ya yooloka oya lopota komalungula kutya omakuyunguto okwa twaalelwa eemwenyo dovanhu 22, mwa kwatelwa omwenyo womupolifi umwe, ve fike lwopo 200 ova monifwa oshiponga novanhu ve dule po1 200 ova tulwa moipandeko.
Oikundaneki ngaashi oBBC Africa News oya holola kutya tameka moLuanda ndele tai tandavele meedoolopa dimwe molwa ondado yomahooli ya londa.
Mopaife, Ovanamibia ngaashi Moshana navakwao ova kwatafana nombelewa yaNamibia moAngola opo va holole oukalipo wavo moAngola voo va dule okumona ekwafo la wedwa po.
“Otwa hala epangelo letu litu pe omukalwa manga omalipimo mumwe taa lotele,” Moshana ta holola.