Omupopiliko wopolifi omupedu komufala Kauna Shikwambi okwa ti omunhu ngeenge a ninga eindilo lomanyala opolifi ina pumbwa a ka tale omanyala aye keembelewa dakula koWindhoek.
Okwa yelifa ya ta ti ovanhu nava kale tava ka tala omanyala avo koitaashi yopolifi oku va ningila omaindilo omanyala.
Edi Shikwambi okwe di popya momukandapitifi oo wa pita Etitano a popya kombinga yovanhu ha ka ngudumana keembelewa da kula oku haku ningwa omanyala.
Omanyala ombapila hai di kopolifi nelalakano lokutala ngeenge omunhu okwa longa oimbuluma ile ahawe.
Oha longifwa kovanhu ngeenge tava kongo oilonga ile tava i kondje yoshilongo.
Okwa ti eshi oshi li eshongo linene la twalelwa kopolifi molwashi konima ngeenge omanyala okwa pu oha tumwa koitaashi oku kwa ningilwa omaindilo ashike oha ningiko efimbo lile shaashi mwene womanyala oha kala eli koWindhoek ta pula.
Okwa weda po ta ti ngeenge owa yi keembelewa domoWindhoek oto hangeko ovanhu ve li momikweyo diledile tava pula omanyala.
“Oha shi kwata omafiku 10 okulonga omanyala konima omunhu a ninga omaindilo. Okudja opo omanyala oha tumwa koitaashi yopolifi nelalakano oovene ve ke mataleko,” ta ti.
Okwa ti osha fimana opo oshiwana shi kale sha ngunguma konima sha ninga omaindilo omanyala avo shaashi oha tumwa koitaashi yavo.
“Oshiwana na shi longele kumwe nopolifi ngeenge tashi ningi omanyala,” ta ti.