Moshitopolwa shaHangwena okuza mesiku 1 Apilili omumvo gwayi sigo onuumvo mo31 yaMalitsa nuumvo omwa lopotwa omaso geli 11 gaantu ya hulitha komukithi gwomalaria.
Dhoka odha popiwa kungoloneya gwoshitopolwa shaHangwena Kadiva Hamutumwa sho kwali kwali ta gandja omushangwahokololo gwoshitopolwa mOmaandaha.“Nonando oshitopolwa sha kala nokulwitha malaria okupitila miikondo ya yooloka moshitopolwa, otwa kala noku lopotelwa iipotha tayi indjipala,” ta popi ngaaka.
Hamutumwa okwa kumagidha wo oshigwana shi tsikile okulongitha omikalo adhihe opo shi ikeelele komukithi ngoka tagu faalele oomwemyo dhaantu.
Sho kwali kwa dhimbulukiwa esiku lyaaniilonga mOshakati Omupresidente Netumbo Nandi-Ndaitwah okwa thindi omuthindo nokukumagidha oshigwana shi longithe omikalo adhihe okukeelela omukithi gwomalaria ngoka gwa dhipaga aantu 95 okuza omumvo gwayi.
“Omukithi gwomalaria ogwa kala nokulopotwa tagu indjipala miitopolwa oyindji moshilongo, onkene epangelo olya kala nokuyambidhidha okushonopaleka iipotha yomalaria osho wo omaso,” Hamutumwa ta popi ngaaka.
Minista guuhaku nonkalo nawa Esperance Luvindao esiku lyaaniilonga okwa popi kutya omukithi gwomalaria ogwa dhipaga aantu ye li 95 okuza omumvo gwayi.“Okuza momasiku 20 gApilili nuumvo iipotha yi li 56 130 oya lopotwa omanga aantu 45 649 ya taambelwa moombete omanga iipotha yomalaria okuza kondje yoshilongo ya ndhindhilikwa yi li 10 466,” Luvindao ta ti ngaaka.Ta ti, iipotha mbyoka oya lopotwa miitopolwa ngaashi, Omusati, Ohangwena, Oshana, Oshikoto, Otjozondjupa, Omaheke, Kavango West, Kavango East, Zambezi osho wo Kunene.
Minista okwa popi kutya omwaalu ngoka otagu ulike oshiponga shomalaria onkene oshigwana osha pumbwa okwiisila oshimpwiyu opo kaashi like koomwe.
Luvindao okwa kumagidha oshigwana shi longele kumwe naanambelewa taya ka pombela omagumbo gawo.
Ta ti, otaya ka kala ye na omandhindiliko ngoka taga ulike kutya oya za koombelwa dhontumba osho wo komalelo goondoolopa shili.
“Okupombelwa okwa simana, okukeelela omukithi gwomalaria ngoka hagu ziilile unene moomwe nohagu faalele wo oomwenyo dhaantu,” ta ti ngaaka.Ta ti, okukeelela malaria ga indjipale ongele ashike oshigwana tashi ka pitika aanambelewa mboka ya pombele omagumbo gawo.
vkaapanda@nepc.com.na