Elelo lyondoolopa lyOndangwa olya ti omatala taga ithanwa Ondjondjo otaga ka kala ga pata okuza potundi 08h00 sigo 13h00 nena oshoka otaga opalekwa agehe.

Omugandji gomauyelele melelo lyondoolopa yOndangwa Petrina Shitalangaho-Mutikisha okwa kumagidha aalandithi ayehe opo ya kuthe ombinga okuopaleka omatala nena, onkene kapena ngoka taka pitikwa okushingitha pethimbo ndyoka.“Elalakano lyokuopaleka okukaleka ehala lyomatala lya yela. Pehala ngele opwa yela nookasitoma ohadhi kala po, sho oshoka hatu kutha aluhe esiku lyokuopaleka atuhe,” ta fatulula ngaaka. 

Shitalangaho-Mutikisha okwa kunkilile nomuthindo kutya ekako oshinima oshiwinayi onkene uuyogoki nawu kale oshinima shotango.Okwa kumagidha oshigwana kutya, esiku ndyoka inali kala olyo tali opalekitha omatala ashike, ihe nashi kale onkalondjigilile noshiholelwa shokwoopaleka aluhe.

“Ondoolopa yOndangwa ohayi longekidha eopaleko lyoondoolopa alihe omumvo kehe oshowo komahala ga yooloka,” ta ti ngaaka.

Shitalongaho-Mutikisha okwa fatulula kutya ohaya longekidha ngaaka nelalakano lyokukaleka ondoolopa ya yela. Ta ti, uuyogoki owa simana onkene oshigwana oshi na oku kala tashi opaleke omalukalwa gasho oshowo omidhingoloko dhasho opo ku yandwe omikithi tadhi vulu okupitila moongaga. Ta kumagidha oshigwana shaNdangwa kutya, nashi kale sha tula uuyogoki komeho. “Ondi inekela kutya kehe gumwe okwa hala ondooloopa ndjika yi hume komeho, pamukalo gwomayakulo ga yooloka, ihe shoka otashi ningwa ashike uuna ondoolopa ya yela, oshoka kape na ngoka ta hala okweeta ehumokomeho mehala lya gagala,” ta ti ngaaka.

Maria Kambinda omulandithi gomomatala Ondjondjo okwa ti nonando ohaya opaleke kehesiku, natango osha simana okuopaleka ayehe oshita. “Otandi kumagidha aalandithi aakwatu opo tu kale ke omahala getu goku landitha ga yela, opo wo tu hile ookasitoma,” ta kumagidha ngaaka. 

Kambinda okwa indile wo elelo lyondoolopa opo okuopaleka hoka ku kale taku ningwa omwedhi kehe. 

vkaapanda@nepc.com.na