Taimi Haihambo 

Ovadali vounona hava fikola poSackaria Shikudule Combined School moshitukulwa shaHangwena ova tungila ovanafikola omuhandjo oo tau dulu okuidilila ovanafikola veli 100 poshikando. 

Ovadali ova lombwela Kundana kutya elalakano lokueta po omuhandjo, oku fya oshisho kutya ounona vavo ove li metonatelo lofikola vo otava di popepi nofikola no itava kala nomainda oo tae va imbi opo velihonge memanguluko. 

Omukulunhu wofikola Taara Shalyefu okwa ti omuhandjo ou ouli momatungo avail, limwe olovamati likwo oloukadona. Omihandjo oda nuninwa unene ovanafikola ava veli meendodo dakula ngaashi ondodo o 10 oshoyo 11 ava hava shange omakonaakono opashiwana. 

“Ovanafikola vahapu ohava ende oinano ile okuuya kofikola omanga vamwe kave na omalusheno komaumbo ngaashi pofikola. Omukalo ou natango otwe u ninga upu, oku teta epangelo ondjilakati shaashi otashi kakala ondjila ile oku etapo omuhandjo woludi eli ngeenge otwa kala ashike twa teelela kepangelo,” Shalyefu ta ti. 

Omatungo vati okwa tungwa po ashike mekelongelokumwe lovahongifikola novadali vounona, omo ovadali vayandja oN$100 keshe umwe. Natango ovakala yoo vena oinyangadalwa ya yooloka yokukonga oshimaliwa opo omatungo aa a fikame po. 

Shalyefu okwa twikila ko kutya natango pofikola ova kala vena po oinyangadalwa ihapu oyo yeva kwafa meongelo loshimaliwa osho. 

“Ovanafikola ava va taalela omakonakono aa paife omo ashike ta veya vadje shaashi paife omuhandjo owa pwa oku tungwa nokuna ashike oinima ishona yapumbwa ko , ashike modula taiya ovanafikola ava veli meendodo dopombada unene ondodo 10 no 11 oshoyo ava hava ende oinano ile ova teelelika va kale opo hava di pofikola,” Shalyefu ta ti. 

Shalyefu okwa ti oilonga yavo oi liwetikile n tapula ekwafo natango moshiwana shi mu kwafe noku muyambidida apa tashi dulu. 

Sackria Shikudule oyo ofikola yoomwaadi dimwe edi hadi piti nawa mOhangwena, nodula yadjako oya ya li yotete moshitukulwa. 

taimihaihambo2000@gmail.com