Auleria Wakudumo 

Ovakwashiwana momukunda Ombafi moshikandjohoololo shaGongo ova halulwa kefyo lomukulupe nomutekulu ovo vati veli tuwa va xulifa meumbo. 

Oshiningwanima osha ningwa Olomakaya lwopo 13h30 lwaapo,momukunda Ombafi moshitukulwa shaMusati. 

Oonakufya ova tongololwa ovo Rufina Aupindi, omukulupe weedula 101 oshoyo omutekulu waye Hilka Tilomalenga weedula 33. 

Aina Aitana, omona womukulupe okwa holola kutya onghundana yefyo laina inai va halula ashike, ndele oili yoo tai limbilike nova fiwa nomalipulo mahapu. 

Aitana okwa ti nonande oonakufya aveshe vaninga omafiku tave li yave, kave udite kutya omolwa shike aveshe vena okuxulifa efiku limwe. 

“Olomakaya, onde keva talela po okukosha nokupa ngeno meme oikulya ngaashi handi shi ningi shito. Onda fikila monduda yameme ashike onda hanga a xulifa nale naashi nda ka ya ngeno monduda yaHilka naye onda hanga a xulifa,” Aitana ta dimbuluka. 

Aitana okwa ti okweli xula okumona oonakufya Etitano lomafiku 01 Auguste efimbo loshitumbetango eshi ekeva talela po shaashi ohava dimo ashike ovo aveke meumbo. 

Efyo lovakwanedimo ava ola kolekwa kopolifi moshitukulwa shaMusati. 

Sheli kolelela kopolifi, oonakufya vati ova kala vena ounghundi wonhumba nova kala tava dudu noshipangelo oule wefimbo. Nakufya womukulupe otaku hokololwa eli xula moshipangelo lwa xuuninwa momafiku 15 Juli neudo omanga omutekulu eli xula mo mo29 Juli 2025 nokwa hangikwa taka shuna vati koshipangelo ngeno momafiku 13 omwedi ou. 

Opolifi oya holola kutya inava didilika efimbo eli oonakufya va xulifa ashike omalutu avo okweli tuwa efimbo lomutenya po13h30. 

Opolifi oya holola kutya otai twikile okuninga omakonakono a wedwa po moshiningwanima eshi. 

Oshiningwanima shikwao, okaana keedula 15 oka xul;ifa eshi vati ka wa kokatemba kadongi. 

Oshiningwanima eshi osha ningwa Etivali lwopo 19h30 lwaapo momukunda Akaonde mOnesi. 

Nakufya okwa tongololwa oye Nekongo Iita. 

-wakudumoauleria@gmail.com