OSHAKATI- Omulumenhu weedula 31 ou e li ondudu ota holoka nena mOmhangu yaMengestalata mOshakati eshi a kwatwa po molwashi ha pange ovanhu ehe na omikanda. 

Okwa kwatwa po Etivali a hangwa meumbo laye kolukanda Evululuko mOshakati efimbo longula. 

Omukulunhu wopolifi moshitukulwa shaShana Commissioner Naftal Sakaria okwa koleka oshiningwanima eshi. 

Opolifi oya hokolola tai ti ondudu vati ohai yandje oimbodi nokupanga ovanhu ovo hava ka dipaa oifitukuti koshikunino shoinamwenyo Etosha National Park. 

Otaku hokolola kutya tete manga omunhu ina ya kEtosha National Park ohava piti kondudu ndele ta pewa oimbodi nelalakano lokukala ina kwatwa po kopolifi. 

Opolifi oya hokolola tai ti ngeenge omunhu okwa aluka kEtosha natango oha piti keumbo londudu oyo ndele ta pewa vali oimbodi opo vati a kale ina monika kopolifi. 

Otaku hokololwa kutya efiku olo ondudu oya kwatwa po nomulumenhu weedula 39 oo taku fekelwa kutya oye umwe womwaavo hava ka dipaa oifitukuti kEtosha pa mukalo woumbudi. 

Omulumenhu ou vati okwa hangika naye keumbo londudu ta pewa oimbodi opo aye kEtosha. 

Opolifi oya ti omufekelwa omutivali ou naye ota holoka momhangu nena. 

Otaku hokololwa kutya efiku olo ondudu oya hangika noshimaliwa keemuma omaN$2 842, osho a pewa kovanhu eshi ve mu futa. 

Omakonakona opolifi ota twikile moshikungu eshi. 

Commissioner Sakaria okwa yelifa ta ti eendudu oha di pewa omikanda odo tadi ulike kutya omunhu oha pange pamukalo woshiwambo. 

“Otuna ashike okukwata po eendudu odo tadi pukifa oshiwana oshoyo okupanga dihe na omikanda,” ta ti. 

Okwa ti Ondudu Dr Andrew Sacharia natango oi li modolongo konima eshi ya kwatwa po shaashi kwa li tai kendabala okudipaa omuneumbo wayo. 

fhamalwa@nepc.com.na