Otjiuru tjEhi, Netumbo Nandi-Ndeitwah u nomaundjiro kutja Onamibia nEhi rOvandoitji maye i kumwe movihungiriro ohunga nOtjiṱiro Otjindjandja tjo 1904-1908.

Wa tjere nao Oroviungura nda zuko pomazemburukiro oyetja 63 wEyuva ra Afrika rOvakazendu, OPAN African Womena’s Day (pawd) mOtjomuise. 

Na tja embo ehongonekwa rombura ndji: “Omatunduuziro wOnawa yOvakazendu va Afrika mOmbwiro nOmbwiko Okutuurungira mOtjisuta”, mari hungirire kotjiungura Onamibia tji ra uta ozombura o-19 nḓa kapita ondjuwo yOzoveta ya Namibia tji ya yakura ombepo, ehi rOvandoitji okuyakura kutja ra tjita Otjiṱiro Otjindjandja mOnamibia kutja otji ra sokuningira ondjesiro nokusuta Otjisuta. 

“Tjazumba, mo 2015, ohoromende ya Namibia, nomaunguriro wakumwe nozondekurona zaimba mba hupa otjikara nomatyasaneno nohoromende yEhi rOvandoitji ohunga nOtjiṱiro Otjindjandja, Ondjesiro nOtjisuta. 

Onḓero okoo kutja otupa atuyevari naṋi tu hakayenene mondjirakati motjiṋa tji,” NNN wa tjere. Operesindenda wa munine kutja embo ehongonekwa ndi otja tji mari handjaurwa morutuu rOruwano rwa Afrika, mari zuvarisa omirari omiparanga vyopokati kotupa vyOtjisuta mbi mavi ṱunu omahausemba worukapitaveze kovakazendu moupapi nouparanga wawo. 

Tjingetjo maru zuvarisa kutja eraka rovakazendu novanatje ovakazona ri neneparisiwe momazuvakero waro, nu tjinene rovakwatera ovaṱiṱi motjivarero noviwaṋa mbya ṱunwa, kutja mozondyero ye zuvakwe mombii yOtjisuta, ousemba nga tjama novitjitwa vyoungetjesa nonḓekisasaneno nomatunduuziro womasorero nomayeneneno nokukutjurura onguyo komeho wovakazendu, ovanatje ovakazona, omitanda, notutu mokati twoviwaṋa notovakwatera. “Itji ma tji tu yandjere kutja tu ngare matu pe zuu nawa natu sora okupahera otjisuta oruvara nousemba wondanaukiro.” 

Nandi-Ndeitwah ma tja embo ehongonekwa ndi ra zikamena kohepero yatjimanga oku hungama ekuruhungi rohuurire, oukarere, ombangu youmuhoko notjivara nomasepero wombinḓu i yovisepambinḓu oure wozombura mbya sesununa onḓengu yOvakazendu va Afrika. Nampa