OSHAKATI- Omukulunhuwiliki woshipangelo shaShakati Dr Ruben Kanime okwa ti otenda ya dikwa moshipangelo shaShakati mo2021 molwa oCovid-19 ita i hanaunwa po molwashi natango otai ka longifwa onga osaala yovanaudu ngeenge oshipangelo tashi li hange momhumbwe keesaala. 

Kanime okwa ti opo va pewa epitikilo kouministeli va twikile oku longifa otenda oyo. Ta ti okwali va nyolela keembonge dakula douministeli wouhaku tava pula epitiko, nenyamukulo lavo olo leva pa eefelo paife olye ya. 

Otaku hokololwa otenda oyo ta pewelwe epengelo komunangeshefa ina tumbulwa pefimbo oshilongo, nounyuni wa li wa taalela oshikumungu shoCovid-19. 

Kanime okwa ti otenda oyo oya pumbiwa shaashi otai dulu okulongifwa kovaunadu pamikalo da yooloka ngaashi okuyandja omulele kovanaudu tava tuminwa koWindhoek ndele ova pumbwa okunangala moshipangelo molwokundja kokule. 

“Ngeenge otwe li hange tuna eesaala tadi longululwa notu li momhumbwe yonhele yokutula ovanaudu ohatu ke va twala kotenda oko. 

“Natango otenda otai dulu okulongifwa ngeenge moshitukulwa mwa lopotwa omikifi odo hadi pula opo omunhu e ke li kalekwalwe mosaala yaye opo ku kelelwe etandavelo lomikifi,” ta ti. 

Okwa fatulula ta ti otenda ei ka kwa li yandja kepangelo ashike okwa li ya yandjwa komunangeshefa wonhumba nelalakano lokuyambidida oshikondo shouhaku molwonghalo yombuto yoCovid-19. 

Okwa ti otenda oya tulwa po pefimbo lombuto loCovid-19 nelalakano lokutambulila ovanhu va kwatwa kombuto ei. 

“Pefimbo olo twa pewa otenda omivalu dovanhu tava kwatwa kombuto yoCovid-19 okwa li tadi ende dau ka pedu,” ta ti. 

Okwa yelifa ta ti naashi osha eta opo ovanhu ashike kwa li va shona va tambulilwa motenda omo. 

“’Okudja opo eshi oCovid-19 ya xula ina tu longifa vali otenda molwashi ka pena vali ovanhu tava kwatwa kombuto,” ta ti. 

Kanime okwa ti otenda oina eembete ya topolwa pokati ina eenduda dukunagala oshoyo omashina okufudifa. 

“Omashina okufudifa otaa ka twalwa keesaala dimwe po domoshipangelo opo a dule okulongifwa,” ta ti. 

Okwa popya ta ti natango otenda ita dulu okudengelulwapo shaashi oya longwa mwa tulwa eengodi dolusheno. 

Kanime okwa ti tete ova kwa li va teelela okupewa enyamukulo okundja keembelewa da kula douministeli wouhaku naashi osha eta opo otenda i kale opo efimbo lile itai longifwa. 

“Paife otwa teelela ashike ovanailonga opo va tameka okulongulula otenda i ningwe endiki lipe,” ta ti. fhamalwa@nepc.com.na