Omukainhu weedula 39 ha longele ehangano lomafudiko okwa xulifila moshiponga shotuwa oyo kwa li ya humbata oshikefa va uka komaendo oku ka ninga efudiko.
Oshiningwanima osha ningwa Etitano komukunda Otjikondo koshitukulwa shaKunene efimbo longula, mondjila pokati Outjo noKamanjab.
Otuwa ohai longele ehangano lomafudiko, nokwa li tava i va ka ninge efudiko.
Omupopiliko wopolifi moshitukulwa shaKunene Warrant Kristofina Hamunyela okwa hokolola ta ti otuwa yeshete hai longele ehangano lomafudiko okwa li i li mondjila ya uka komaendo tai ka paka olutu lomunhu ou kwa li e li moshikefa.
Opolifi oya hokolola tai ti omulumenhu weedula 52 oo a li ta shingi okwa nyengwa okupangela otuwa ndele tai alangata nokulidenga po.
Oshikefa vati osha wa mo motuwa ndele tashi ke lidenga komukunghulo wopate.
Motuwa okwa li mu na ovanhu vatatu – omulumenhu umwe, novakainhu vavali. Omukainhu umwe omukwapata wanakufya ou kwa li a humbatwa motuwa oyo.
Omushingi osho yo nomukainhu ou womukwapata wanakufya ova tambulilwa moshipangelo tava mono epango lopaunamiti, omanga omukainhu oo e li omunailonga mehangano lomafudiko a ka xulifila koshipangelo shaKatutura koWindhoek Osoondaxa.