UUVUDHIYA – Ngoloneya woshitukulwa shaShana Hofni Iipinge okwa kumaida ovakulupe opo va longife nawa oshimaliwa shavo shopendjela okulanda oipumbiwa yomomaumbo. 

“Oshimaliwa kasha shi shokulanda omalodu. Xulifei po okulanda omalodu keendingosho,’’ ta ti. 

Edi ngoloneya okwe di popya pefimbo a talela po oshikandjohoololo shaUuvudhiya onghela. 

Iipinge okwe lipyakidila nokutalela po oikandjohoololo ya yooloka moshitukulwa shaye. 

Okwa ti elalakano okudidilika omashongo aa a taalelwa koshiwana osho yo okukaleka po elongelokumwe. 

Iipinge okwa ti ombelewa yaye oya lopotelwa kombinga yovadali tava hepeke ounona vavo momaumbo unene tuu eefiye. 

Okwa kumaida ovadali opo va xulife po okuningila ounona omahepeko omomaumbo molwaashi osha nyika oshiponga notashi ulike efano lii. 

“Oimaliwa yopendjela younona nai kwatwe nawa ndele tamu landele ounona oidjalomwa osho yo oipumbiwa yofikola,” ta ti. 

Iipinge ou opo a ulikwa omwedi wa dja ko a ninge ngoloneya waShana, okwa udaneka ta ti ombelewa yaye otai ka longa pauyuuki okuandjaneka omayakulo koshiwana. 

“Oshitukulwa shetu otashi xumu ashike komesho ngeenge hatu longeleni kumwe,” ta ti. 

Okwa ti ombelewa otai ka tula moilonga eepoloyeka dokuyambidida ovanyasha molwaashi otashi kwafele okulwifa ondjala noluhepo. 

Iipinge natango okwa ti ombelewa yaye otai kwashipaleke elongifo nawa loshimaliwa opo shi longifwe moinima ei tai yambula po oshitukulwa. 

“Omunhu ngeenge okwa pewa omakwafo okuninga opoloyeka yaye na kwashipaleke kutya ota ka longa noudiinini. Inandi hala okumona ovanhu tava hepeke oimaliwa yepangelo eshi va mwena itava longo meepoloyeka davo,” ta ti. 

Natango ngoloneya okwa kumaida oshiwana opo shi longele kumwe okukandeka oimbuluma momidingonoko davo. 

“Ovanhu tava vake po oimuna yovanhu nava lopotwe kopolifi,” ta ti. 

-fhamalwa@nepc.com.na