Taimi Haihambo
OSHIKUKU – Katokote mokutanda omesho moNamibia Dr. Helena Ndume okwa yandja enyenyeto laye kepangelo laNamibia, eshi tali yandje eetendela kovanhu dokulanda omiti depango.
Edi okwe di popila koshipangelo shaShikuku, pefimbo kwa li ta yandje etando lomesho kovakulpe ovo va twika.
Okwa ti omukalo ou tau longifwa kepangelo wokuyandja eetendela kovanhu dokulanda omiti otau mane po epangelo neenghono, shaashi vati ovakufepo veetendela otava ningi omiti ondilo, sho osho oipangelo yepangelo ihe na vali omiti.
“Ngeno okwa li epangelo tali kala ashike hali kala tali lande omiti loovene ngeno xwepo vali shaashi otashi kala shi na ombilixa. Ovanhu ava hava pewa eetendela paife otava lyatele unene epangelo pedu,” Ndume ta ti.
Okwa twikila kutya eendokotola moipangelo odi li mo tadi longo noudjuu shaashi vati poima kape na omiti. “Ngaashi eike paife ngaha eshi handi longo nopolohalama yokutanda omesho, oshili ohandi longo noudjuu shaashi kape na omiti domesho,” ta ti.
Ndume okwa ti yee oku na ashike elao shaashi oku na eendokotola hadi di kondje yoshilongo hadi ya oku mu vatela oshali ngeenge ta tameke oshikonga shaye shokutanda omesho keshe odula. Okwa ti eendokotola ohadi ya needila tadi li futile doo vene, naapa hadi nangala, olweendo lavo meni loshilongo osho yo oikulya yavo, nepangelo ihali futu ko sha nande.
Eendokotola edi okwa ti ohadi ende yoo nomiti osho yo oipangifo ikwao ya wedwa po okukwafela omatando aa oshali.
Oshikonga shokutanda omesho paife oshi li moshitukulwa shaMusati moshipangelo shaShikuku, omo at anda ovakulupe 450, va li va twikwa ndele paife ova shuna komaumbo ve wete ko.
Moshikonga shaye omu na ndokotola umwe e liyamba okudja koCalifonia, umwe okwa dja koLondon, eendokotola nhano domoNamibia, novapangi ve li 18.
Neudo etando laye lomesho ola tameka koshitukulwa shaHardap, tali ya koKavango- East, Ohangwena, Omusati tali notali ka xuuninwa koshitukulwa shaShikoto momwedi tau ya.
Nonande Ndume a hololela epangelo laNamibia enyeme laye eshi voo tava longo noudjuu, natango okwe li pandula eshi la kala tali dana onghandangala mokututa ovakulupe keenhele da yooloka oku va eta ketando lomesho, osho yo oku va shuna ko konima va pwa.
Okwa yandja yoo olupandu natango kepangelo eshi la kala nokupa ovanhu ava oikulya osho yo ovapangi koitukulwa eshi va kala nokuyakula ovanhu ava nombili.
-taimihaihambo2000@gmail.com