Ovahongi vopofikola Helao Nafidi Combined momukunda Oshiti shaHaihonya mOkongo ova fiya po omaumbo nomatukutuku avo, va dika onhanda yeebashu pofikola molwoukule wofikola okuya nokudja kopate nokodoolopa.
Eshi otashi holola ohokwe yomuhongi nelitulemo lovahongi moilonga yavo okukwashilipaleka kutya okaana Okanamibia oka pyokoka mehongo opo ka kale ke na onakuiwa.
Omukulunhufikola Elias Hamukwaya okwa holola kutya ovahongi vamwe ove na eetuwa ashike ohadi fyaala kOkongo shaashi itadi dulu okufika kofikola molwefululu.
Hamukwaya okwa ti ovahongifikola itava dulu okudja kodoolopa kOkongo keshe efiku shaashi kave na kutya otava di ko nashike.
“Kofikola yetu ohaku fikwa ashike keetuwa edi da kula deebaki odo di na efimbo kutya ohadi d iko nokuya ko efimbo peni,” Hamukwaya ta ti.
Nonande va taalelwa komashongo mahapu, Hamukwaya okwa ti ovahongi vaye inava fya ounye ile va shune omutwe moipeta moilonga yavo. Hamukwaya okwa ti pofikola yavo ope na ashike eumbo lovahongi londuda imwe omo mu na ovahongi ovakainhu vavali novalumenhu vavali.
“Molwomhumbwe ei, ovahongi ova landa oipeleki yavo ndele tava dengele eebashu davo moluumbo lofikola opo va kale popepi noilonga,” Hamukwaya ta yelifa.
Pofikola ope na ashike eeboloka mbali dekuma, oboloka imwe oi na eengulu nhatu dovahongwa omanga ikwao i na eengulu nhee nomatala ile eebashu di li 10.
“Onda tameka ongomukunhufikola poHelao Nafidi mo2003 nohandi pendjelwa modula tai ya muJanuali. Moule wefimbo alishe olo, inandi kwatwa nande okedilaadilo lokufiya po ofikola ei molwomashongo oo twaa taalela shaashi ondi na ovahongwa vange komutima,” Hamukwaya ta holola.
Hamukwaya okwa ti ovahongi unene ava vovakulunhu ova ika paife onghalo, kakele kwaavo vashona ovo hava tula mo omaindilo opo va ye keefikola dimwe molwonghalo.
Kansela woshikandjohoololo shaKongo Efraim Shipindo okwa holola kutya ombelewa yaye oya kwafela okutunga omuhandjo wovamati woshipeleki pofikola.
“Otwa dengela oshipeleki shovahongwa 10. Ombelewa yange ohai kwafele yo okuyandja oututa kounona voukadona. Mopaife out na omatalashe twa hala okutwala kofikola,” Shipindo ta ti.
Shipindo okwa ti nonande va hala okuyandja omatalashe, inaa wana natango. Kansela okwa ti ova hala okuyandja omatalashe e li 100 ashike ove na po ashike omatalashe 40.
Kansela okwa holola kutya ofikola ohai shiti ounona okudja koshitukulwa shaShikoto nOhangwena.
Molwaashi ovahongwa ava ohava ende oinano ile okutavakana pokati koitukulwa ei ivali, ofikola oye ya po nonghendabala yokukaleka ovahongwa momuhandjo.
Ofikola Helao Nafidi Combined oya li ya talelwa po Etivali kungoloneya woshitukulwa shaHangwena Kadiva Hamutumwa opamwe nOmukulunhu wehongo moshitukulwa shaHangwena Isak Hamatwi.
Hamatwi okwa udaneka kutya ouministeli wehongo otau ka tunga omuhandjo wovahongwa osho yo okutambula ko eindilo lofikola okukala i na ondodo 10 modula tai ya.
– wakudumoauleria@gmail.com